Перизат Қайрат үй берем деп тағы бір адамды алдап соққан

Елорда тұрғыны Әсел Омарова осыдан екі жыл бұрын "BIZ BIRGEMIZ" қорының атынан өзіне Перизат Қайрат хабарласып, пәтер берілетінін айтып, үміттендіріп қойғанын жеткізді, деп хабарлайды Malim.kz.

Әлеуметтік желіде баласымен такси жүргізіп танылған әйел уәде етілген пәтерді ала алмай жүргенін айтады. Оған үйдің сертификатын көпшіліктің алдында табыстаған еді.

"Жамандыққа қимаймын, дегенмен "барды бар, жоқты жоқ" деп айтар сәт келгендей. 2022 жылы қарашада Перизат үйіме келіп, "үй табыстаймыз" деп айтып кеткен еді. Кейін Жаңа жылдық мерекеге орай үлкен галаконцерт болып, сол жерде сертификат ұстатқан. Бірақ үй берілмеді", – деді ол.

Әсел Омароваға белгілі бір тұрғын үй комплексінен үй беріледі деп айтылған. Бірақ кейін хабарсыз кетті дейді.

Айтуынша, өзі хабарласқан кезде "күнде ертең" деп түрлі сылтаумен Әселді ұзақ күттіріп қойған.

"Үміт деген қиын екен, "әне, міне беріп қалар" деп күтіп жүр едім. Соңғы рет 4-5 ай бұрын хабарластық, сол кезде "1-2 айдан соң беріледі" деді. Бірақ қайтадан үнсіз қалды", – деді ол.

Айта кетейік, келіншек елордада балаларымен әлі де пәтер жалдап тұрады.