Қостанай облысында шенеунік өз әрекеті үшін жауапкершілікке тартылды, деп хабарлайды Malim.kz.
Қостанай облысы әкімдігі дене шынықтыру және спорт басқармасының спорт бөлімінің басшысы Алмас Әбілдин қызметінен төмендетіліп, айыппұл салынды.
«Қызметтік тергеу мен Әдеп жөніндегі кеңестің отырысының нәтижесінде, Әбілдин А.М.-ға мемлекеттік қызметшілердің Әдеп кодексінің нормаларын бұзғаны үшін тәртіптік жауапкершілікке тарту түрінде мемлекеттік лауазымда төмендету туралы шешім қабылданды», – деді Мемлекеттік қызмет істері агенттігінің Қостанай облысы бойынша департаментінің басшысы, Әдеп кеңесінің төрағасы Ерлан Салықбаев.
Алмас Әбілдин бұған дейін басқармада жетекшілік қызмет атқарған болса, қазір ол бас маман лауазымына төмендетілді.
Сонымен қатар, шенеунік ұсақ бұзақылық үшін әкімшілік жауапкершілікке тартылып, 78 640 теңге айыппұл төлеуге міндеттелді.
Бұған дейін Kozachkov offside телеграм-арнасы Әбілдиннің спорт нысандарының бірінің күзет қызметкеріне әдепсіз сөздер айтып жатқан видеосын жариялаған болатын. Кикілжіңді куәгерлердің бірі видеоға түсірген.
Фото: видеодан кадр
