Семейде шыршадан құлаған мұғалімнің әйелі жағдайдың қиын екенін айтты
Бірақ міндетті түрде қасына күтіп отыратын адам керек.
Семейде шыршаны безендіріп жатып жарақат алған мұғалімнің әйелі күйеуінің қазіргі жағдайы қалай екенін айтып берді, деп хабарлайды Malim.kz
kaz.inform.kz-ке сілтеме жасап.
Қуат Айтқалиев Семейдегі №49 мектептің қазақ тілі және әдебиет пәнінің мұғалімі болып жұмыс істейді. 21 желтоқсанда ол орталық алаңдағы жаңажылдық шыршаны безендіру кезінде құлап, жарақат алған.
Сол кезде Оқу-ағарту министрі Ғани Бейсембаев бұл жағдайды жеке бақылауына алып, мұндай әрекеттердің ҚР "Педагог мәртебесі туралы" Заңын өрескел бұзатынын айтты.
Мұғалімдерді кәсіби қызметіне қатысы жоқ жұмыстарға тартуға тыйым салынады. Тергеу амалдары талапқа сай жүргізіліп, осындай жағдайдың қайталанбауы үшін тиісті шаралар қабылданады деп сенеміз, деді министр.
Көп ұзамай ұстаздың жарақат алуына байланысты қалалық білім бөлімінің басшысы Біржан Бұлабаев қызметінен босатылып, қала әкімінің орынбасары Арайбек Хамзаевқа сөгіс жарияланды.
8 қаңтарда Қуат Айтқалиевтің ауруханадан шығарылғаны хабарланды. Осыған орай Kazinform агенттігінің тілшісі мұғалімнің әйелінен күйеуінің қал-жағдайын сұрап көрді.
Жұбайым шырша безендіріп жатқанда биіктен құлап, басынан ауыр жарақат алған. Қазір ауруханадан шығып, үйде жатыр. Бірақ міндетті түрде қасына күтіп отыратын адам керек. Өзім қарап отырмын, бірақ мен жұмысқа кеткенде анам қарайды, дейді Сымбат Аянқызы.
Оның айтуынша, бүгінде тергеу амалдары әлі аяқталған жоқ.
Біз кінәлілер жазасыз қалмасын дейміз. Бәрі заң шеңберінде болсын. Тергеу аяқталып, нақты кім кінәлі екендігі белгілі болған соң оны сотқа беріп, өтемақы талап етеміз. Бірақ әзірге өтемақы сомасын айта алмаймын. Оны заңгермен бірге есептейміз, дейді Сымбат Аянқызы.
Фото: KAZ.NUR.KZ
