Су тасқыны: Орал тұрғындары дереу қауіпсіз жерлерге көшіріледі
Бүгінде Жайықтың деңгейі 8 метрге жуықтаған, ал ең қауіпті деңгей 8 жарым метр саналады.
Орал қаласындағы қауіпті аймақтардың тұрғындары дереу қауіпсіз жерлерге көшірілуі тиіс. Қала әкімдігі тұрғындарға осындай үндеу жасады, деп хабарлайды Malim.kz.
Себебі, мамандардың пайымына сай, Ресей Федерациясының Орынбор аумағынан алдағы 2-3 күнде үлкен көлемде су келеді. Бүгінде Жайықтың деңгейі 8 метрге жуықтаған, ал ең қауіпті деңгей 8 жарым метр саналады.
24.kz аймақта төтенше жағдайлар қызметі мен күштік құрылым мамандары тәулік бойы жұмыс істеп жатқанын жазды.
Жалпы саны 6 жарым мыңға жуық адам мен 1 мың 400 техника тартылған. Облыс әкімі баспасөз қызметінің басшысы Орал қалсында және облыстың 4 ауданында су тасқыны қаупіне байланысты жағдай күрделі болып отырғанын жеткізді.
Атап айтқанда, Орал қаласындағы Жайық өзені бойындағы саяжайлардың су басу қаупі жоғары. Аудандар тұрғындары шұғыл арада эвакуациялануы қажет. Судың мол көлемі кез келген уақытта жетіп, үйлерді су басуы мүмкін деген хабар тарауда. Осыған байланысты облыс орталығында эвакуациялық пункттер жасақталған. Олар тұрғындарды күні-түні үздіксіз қабылдайды, - дейді БҚО әкімі баспасөз қызметінің басшысы Ерхан Тәткен.
Фото: naryntany.kz
