Темір жол саласында аса ірі көлемде қаржы жымқырғандар сотталды
159 млн теңгеден астам ақша ұрланған
Астана қылмыстық істер жөніндегі ауданаралық сотының «Әскерилендірілген темір жол күзеті» ЖШС бас директоры, оның орынбасары және ЖШС бас менеджеріне қатысты аса ірі көлемде қаржы жымқырғаны үшін айыптау үкімі заңды күшіне енді. Бас көлік прокуратурасы осындай ақпарат таратты.
Сот талқылауы барысында сотталушылар теміржол станциялары үшін бейнебақылау жабдықтарын сатып алу және монтаждау бойынша аффилиирленген компаниялармен шарттар жасасу жолымен өздеріне сеніп тапсырылған 159 миллион теңгеден астам ақша ұрлағаны айыптаумен дәлелденген болатын.
Алайда, жабдық толық жеткізілмеді, техникалық сипаттамаларға сәйкес келмеді немесе ақаулы болды. ЖШС бас менеджерінің рөлі бақылаудағы кәсіпкерлерді табу және бейнебақылау жүйелерін өз бетінше орнату болды. ЖШС бас директоры мен оның орынбасары қабылдау актілеріне қол қойып, заңбұзушылықтарға қарамастан мердігерлерге төлем жасаған.
Бас көлік прокуратурасының мәліметінше, сотталғандар енді өмір бойы мемлекеттік қызметте жұмыс істей алмайды. Олар 7 жылдан 8 жылға дейін әртүрлі мерзімге бас бостандығынан айырылды. Сот сотталғандардан келтірілген шығынды да өндіріп алды.
Фото: Gov.kz
