Жезқазған қалалық соты қызды жалаңаш күйде жасырын видеоға түсіріп, жәбірленушіден ақша бопсалаған ер адамға қатысты қылмыстық істі қарады, деп хабарлайды Malim.kz.
Ер адамға Қылмыстық кодекстің 194-бабының 1-бөлігі бойынша айып тағылған. Сот отырысы кезінде ер адам қыздың келісімінсіз оны жасырын камераға түсіргені анықталды. Интимдік сипаттағы бейнематериалда жәбірленушінің жеке өміріне қатысты, оның ар-намысына нұқсан келтіретін материал болған.
2024 жылғы 8 желтоқсанда ер адам қызға өзі түсірген видеоны жіберіп, 1,5 миллион теңге талап етеді. Егер ол ақша бермесе, бейнежазбаны әлеуметтік желілерде жариялап, туыстары мен әріптестеріне тарататынын айтып қорқытады. Жәбірленуші талапты орындау ниетін көрсету үшін сол күні ер адамның шотына 10 000 теңге аударған. Бірақ ертесіне қыз полицияға арызданып, күдікті қала көшелерінің бірінде 80 мың теңге алып жатқан жерінен ұсталады.
«Сот отырысында жәбірленуші тараптардың татуласқанын, моральдық және материалдық шығынның толық өтелгенін мәлімдеп, қылмыстық істі тоқтатуды сұрады. Судья алғаш рет жасалған орташа ауыр қылмыс болғанын, тараптардың татуласқанын және келтірілген залалдың өтелгенін ескеріп, қылмыстық істі тоқтату туралы шешім қабылдады», - делінген хабарламада.
Сот қаулысы заңды күшіне енген жоқ.
Фото: pixabay.com
