Астана қаласының Полиция департаменті белгілі қазақстандық боксшы Данияр Елеусіновтің қатысуымен болған жол-көлік оқиғаларының және оның ұсталған сәтінің видеосын жариялады, деп хабарлайды Malim.kz.
Полиция мәліметінше, Toyota Land Cruiser көлігінің жүргізушісі бірнеше жол апатынан кейін оқиға орнынан кетіп қалған. Жедел-іздестіру шараларының нәтижесінде ол ұсталды.
Жарияланған кадрларда жол апаты болған орындар, жүргізушінің ұсталуы, медициналық куәландырудан өтуі және сот отырысы көрсетілген.
Құқық қорғау органдары жүргізушіге көлік құралын алкогольдік масаң күйде басқарып, жол-көлік оқиғасына себеп болғаны және оқиға орнын тастап кеткені үшін әкімшілік хаттамалар толтырылғанын хабарлады.
Полиция мас күйінде көлік жүргізу мен жол апаты болған жерден қашып кету заңды өрескел бұзу екенін және мұндай әрекеттер жол қозғалысының барлық қатысушыларының өмірі мен қауіпсіздігіне елеулі қатер төндіретінін еске салды.
