Мамай мен Иманбаева еш жазықсыз кінәлаған жандар Байбектің үлгісімен сотқа беруі тиіс – заңгер А.Тәшенова

Алматының Әуезов аудандық №2 сотында "Nur Otan" партиясы төрағасының бірінші орынбасары Бауыржан Байбек пен белсенділер Жанболат Мамай мен Инга Иманбаеваның арасындағы дау бойынша негізгі сот процесі басталды.

Бауыржан Байбектің заңгері Айжан Тәшенова Жанболат Мамайдан жала естіген өзге тұлғаларды Бауыржан Байбектен үлгі алып, үстінен сотқа шағымдану керек деді.

" Мамайдың айтып жүрген демократиясы ойыңа келгеннің бәрін айту емес, құқықтың алаңда мәдени қарым-қатынас. Енді Мамайдан бұған дейін жала естіген өзге тұлғалар да Бауыржан Байбектен үлгі алып, оның үстінен сотқа шағымданады деп үміттенемін», - деді заңгер.

Ал жауапкерлерді қорғау тарабы сотқа Бауыржан Байбек пен оның туыстарын шақыртып, жаап алуды сұрады. Өйткені қорғау тарабының айтуынша,  "іске қатысы бар құжаттарда Байбектің әкесі, қарындасы, әйелінің туыстарының аты аталады".

Алайда судья Сартаева бұл өтінішті қанағаттандырмады.

"Байбектің әкесі, әпкесі кәсіпкерлер екені баршаға мәлім. Мысалы, оның әкесі Қыдырғали Байбек жасы жетпістен асқанда кәсіпкер атанып кетті. Ата-анасы бұрын-соңды бизнесте болмаған адамдар. Оның бизнесте өрлеуі Бауыржанның мемлекеттік қызмет сатысымен өскенімен қатар келіп отыр", - деді сотта сөйлеген Жанболат Мамай.

Демократиялық партия құру жөніндегі бастамашыл топ жетекшісі Жанболат Мамай сәуірде Youtube-тегі "Бауыржан Байбек: Назарбаев сыныптасы баласының жемқор бизнес-империясы" атты  видео жариялаған. Зерттеуде Жанболат Мамай Алматының бұрынғы әкімі Бауыржан Байбекті "мемлекеттік қызметте жүріп үлкен бизнес-империя құрды", "құрылысқа және көлік тұрағына" қала аумағының және Іле-Алатау ұлттық паркінің "жерін берді", "пара алды", "көмір мафиясын құрды" және Алматыдағы ЖЭС-2-ні "газға көшіруді кешеуілдетті" деп айыптаған.

Бауыржан Байбек осы фильмнен кейін белсенділер Жанболат Мамай мен Инга Иманбаеваның үстінен "ар-намыс пен іскерлік беделге нұқсан келтіру" бабы бойынша сотқа шағым түсірді. Жауапкер тараппен шағыммен келіспейді.