Путин Пригожиннің бүлігі кезінде ұшқыштар өлгенін мойындады
Ресей президенті Владимир Путин Бірінші арнадан халыққа үндеу жолдады.
Путиннің – «Вагнер» жалдамалыларының жетекшісі Пригожин бүлігінен кейін алғаш эфирге шықты. Путин бүлік кезінде әскери ұшқыштар өлгенін мойындады. Бұған дейін ұшқыштардың қаза тапқаны ресми расталмаған болатын.
«Ұшқыштардың ерлігі Ресейді сақтап қалды»,- деді Путин. Бірақ олардың қазасына кінәліні атамады, кім жауап беретінін де айтпады.
Путин «Вагнер» жауынгерлерін әлдекім пайдаланбақ болғанын, бірақ олардың «соңғы сызықтан өтіп кетпей, дұрыс шешім қабылдағанына» алғыс айта отырып, Ресей қорғаныс министрлігімен келісімшарт жасауды немесе үйлеріне оралуды, не болмаса Беларуссияға кетуді ұсынды.
«Кеткісі келгендер Белоруссияға кете берсін. Уәдемді орындаймын. Қайталаймын, әркім өзі таңдасын, бірақ бұл - қателігін түсінген Ресей жауынгерінің таңдауы болады деп сенемін», – деді Путин.
Путин 24 маусымда оқиға басталған кезде-ақ қантөгіске жол бермеуге бұйрық бергенін мәлімдеді.
Алайда Евгений Пригожин бастаған «Вагнер» жалдамалылары Мәскеуге «әділет жорығы» кезінде Ресей тұрақты әскерінің бірнеше тікұшағы мен ұшағын атып түсіргені, бірнеше ұшқыш (нақты саны туралы ресми ақпарат жоқ) қаза болғаны туралы хабар тараған.
Путиннің сөзінше, бүліктің тоқтауына шешуші ықпал еткен күш - Ресей қоғамының ынтымағы мен патриоттық көңіл күйі болған. Ол Александр Лукашенкоға «жағдайды бейбіт шешуге үлес қосқаны үшін» ризашылығында білдірді.
Үндеу алдында Путиннің баспасөз хатшысы Дмитрий Песков Путиннің үндеуі «Ресейдің алдағы тағдырын анықтайды» деп мәлімдеген болатын.
23 маусымда «Вагнер» жалдамалыларының жетекшісі Евгений Пригожин Ресей қорғаныс министрлігін «тылымыздан зымыранмен атты» деп айыптап, қорғаныс министрі Шойгу мен бас штаб бастығы Валерий Герасимовты жауапқа тарту үшін Мәскеуге қарай «әділет жорығына» аттанатынын мәлімдеген.
«Вагнер» жалдамалылары бір тәулікте Дондағы Ростов пен Воронеж қалаларына бақылауға алып, әрі қарай Мәскеуге шыққан. 24 маусымда «Вагнер» Мәскеуге шамамен 200 шақырым қалғанда Пригожинмен Александр Лукашенко сөйлесіп, «Вагнер» жасағы тоқтаған болатын.
Байланысты жаналықтар
MalimBlocks
НАТО саммиті: 75-ші басқосу Украина үшін не берді?
Осы аптада америкалық БАҚ 9-11 шілде аралығында Вашингтонда өткен Солтүстік Атлантикалық альянстың 75-ші саммитінің барысы мен алғашқы нәтижелерін талқылады. Болжам бойынша, көптеген бұқаралық ақпарат құралдарының назары Джо Байденнің президенттік сайлауға қатысу қабілетін көрсетуге бағытталған. Сонымен қатар, Украина тақырыбы, Қытай, сондай-ақ, альянстың реформа жасау қабілеті саммит қорытындыларын талдайтын мақалалардың негізгі тақырыптарына айналды.
