Күнделікті қолданылатын электр шәйнектің түбінде уақыт өте келе ақшыл немесе сарғыш қабат пайда болады. Көпшілік оны кір немесе тот деп ойлауы мүмкін. Алайда көбіне бұл — судың құрамындағы минералдардан жиналатын қақ. Мұндай қабат көбейген сайын шәйнектің жұмыс тиімділігіне де әсер етуі мүмкін, деп Malim.kz тілшісі, Breville-ге сілтеме жасай отырып хабарлайды.
Оны кетіру үшін қымбат тазартқыш сатып алудың қажеті болмауы мүмкін. Үйде кәдімгі ас сірке суы болса жеткілікті.
Сірке суымен тазалау тәсілі
Breville электр шәйнектеріне арналған нұсқаулықта қақты кетіру үшін сірке суының бір бөлігіне судың екі бөлігін араластыру ұсынылады.
Мысалы:
• 200 мл сірке суы;
• 400 мл су.
Қоспаны шәйнекке құйып, қайнатыңыз. Содан кейін оны бірнеше сағатқа, ал өндіруші нұсқаулығына сай мүмкін болса, түнге қалдыруға болады. Ерітіндіні төккеннен кейін шәйнекті таза сумен толтырып, қайта қайнатыңыз да, суды төгіңіз. Осы әрекетті тағы бір рет қайталаған дұрыс.
Лимон қышқылы да көмектеседі
Кейбір электр шәйнектерінде қақты кетіру үшін лимон қышқылын қолдануға болады. Мысалы, Philips нұсқаулығында шәйнекті алдымен шамамен төрттен үш бөлігіне дейін сумен толтырып, қайнатып, кейін лимон қышқылы ерітіндісін қосу ұсынылады. Тазалағаннан кейін ыдысты жақсылап шайып, таза суды қайнатып төгу қажет.
Неліктен қақты уақытында тазалау керек?
Қақтың жиналу жылдамдығы судың кермектігіне байланысты. Өндірушілердің айтуынша, минералды қабат көбейген жағдайда құрылғының тиімділігі төмендеп, қыздыру элементіне қосымша салмақ түсуі мүмкін. Сондықтан шәйнекті мезгіл-мезгіл тазалап отырған жөн.
Тағы бір маңызды жайт – шәйнектің ішін темір жөкемен немесе қатты абразивті құралдармен ысқыламаған дұрыс. Олар құрылғының ішкі бетін бүлдіруі мүмкін.
Ескерту: тазалау алдында нақты шәйнегіңіздің нұсқаулығын тексеріңіз. Кейбір құрылғыларда өндіруші белгілі бір тазартқышты ғана қолдануды талап етуі мүмкін.
