Өзге тұрмақ, өз туысыңның үйіне бара алмайсың – Досымжан Таңатаров

Қазақстандық танымал әнші, Еңбек сіңірген қайраткер, «Дарын» мемлекеттік сыйлығының лауреаты Досымжан Таңатаров Qazaqstan телеарнасына сұхбат беріп, қазір адамдардың бір-бірінің үйіне қонаққа баруының өзі қиын болып кеткенін айтты, деп хабарлайды Malim.kz.

Өнер иесі қазіргі балалардың басқа заманда тәрбиеленіп жатқанын алға тартты.

Біз бұрын басқа уақытта тәрбиелендік, туыстарымыздың үйіне емін-еркін бара алатынбыз. Қазір ешкім ешкімге беймезгіл, бей уақытта бара алмайды. Барса хабарласып, алдын ала айтады. Біздің кезде телефон да жоқ, үйіне барып алып, үйінде жоқ болып қалып, есігінің алдында отыра беретінбіз. Түннің бір жарымында құда бола ма, басқа бола ма, тіпті бір көрген адамның үйіне кіре беретінбіз.

Олар оны кәдімгідей қабылдайтын, олар сосын жоқты да, барды да қабылдай беретін. Сын көзбен қарамайтын, оны біз де қабылдай беретінбіз, осындай екен болды дегендей. Солармен бірге аштықты-тоқтықты көріп, бар нәрсені жеп жүре бердік.

Қазір бөтен түгілі, өз туысыңның өзі «біз келе жатырмыз, бола ма, болмай ма» деп ескертеді. Ол болмайды десе, ренжуге хақың жоқ. Сондықтан ұл-қыздарымыз басқа уақытта тәрбиеленіп келе жатыр, деді әнші.

Фото: instagram.com/dossymzhan_tanatarov