Астананы қалың қар басты. Тұрғындар автобустардың кешігуіне шағымданып жатыр
Қоғамдық көліктерді аялдамада күтіп қалған адамдар көп
Астанада қалың қар мен көктайғақ салдарынан, автобустар кешігіп жатыр.
Қоғамдық көліктерді аялдамада күтіп қалған адамдар көп. Көшелердің көпшілігі тазаланбаған. Тұрғындар автобустардың кешігуіне шағымданып жатыр. Желіде бірден бірнеше автобустың қар құрсауында қалғаны түсірілген фото-видео тарады.
CTS барлық жол қозғалысына қатысушыларды жолда мұқият болуға және бағдарды алдын ала жоспарлауға шақырды.
«Барлық жүргізушілерді жолда мүмкіндігінше мұқият болуға, қауіпсіз қашықтықты сақтауға, жылдамдық режимін таңдауға, шұғыл тежеуді болдырмауға шақырамыз. Біздің компанияның диспетчерлік қызметі қаладағы қоғамдық көліктің қозғалысын онлайн режимде бақылайтынын атап өту қажет», - делінген хабарламада.
Төтенше жағдайлар министрлігінің хабарлауынша, ауа райының қолайсыздығына байланысты 112 желісіне 3500-ден астам қоңырау түскен.
Астана қаласы Төтенше жағдайлар департаментінің бөлімшелері қар құрсауынан 2 автокөлікті эвакуациялап, адамдарды қалаға жеткізді.
Күннің бұзылуына байланысты көліктің барлық түрі үшін автожолдарда төрт бағыт бойынша қозғалыс жабылды. Олар: Астана-Қорғалжын, Астана-Ерейментау-Шідерті, Астана-Анар станциясы, Астана-Щучинск.
Фото: Tengrinews.kz
