Владимир Зеленскийдің жарлығымен Украина 91 теңіз кемесіне қарсы санкция енгізді, олар Ресейдің «көлеңкелі флотына» жатады, деп хабарлады президенттің ресми сайты.
«Ресей бұл кемелерді ресейлік порттардан, соның ішінде Новороссийск, Усть-Луга және Приморск порттарынан үшінші елдерге мұнай мен мұнай өнімдерін тасымалдау үшін пайдаланған. Бұл Еуроодақтың, G7 және басқа елдердің санкцияларын айналып өту арқылы жүзеге асырылған. Мұны Қара, Қызыл және Балтық теңіздеріндегі мониторинг нәтижелері дәлелдейді», — деп мәлімдеді Украина президенті кеңсесі.
Санкцияға іліккен кемелер шамамен 20 елдің туы астында жүреді, олардың тек біреуі ғана Ресей туы, ал қалғандары Панама, Либерия, Камерун, Барбадос, Маршалл аралдары, Гонконг, Сьерра-Леоне және басқа елдердің тулары.
Украинаның тізіміндегі 27 кеме бұған дейін АҚШ, Еуроодақ, Ұлыбритания және Швейцария санкцияларына іліккенін Зеленский кеңсесінде атап өтті. «Көлеңкелі флоттың танкерлері мұнайға салынған санкцияларды айналып өтудің негізгі құралы болып табылады, сондықтан оларды анықтау және оларға қарсы санкция енгізу жедел әрі еш ерекшеліксіз жүзеге асырылуы тиіс», — деді Зеленскийдің санкциялық саясат жөніндегі уәкілі Владислав Власюк.
