Қазақстанның Еңбек және халықты әлеуметтік қорғау министрлігі зейнетақы жинақтарына қатысты 2003 жылдан бері қолданыста болған мемлекеттік кепілдікті алып тастау жөніндегі нормаға түсініктеме берді, деп хабарлайды Malim.kz.
Министрліктің мәліметінше, бұл кепілдік азаматтардың зейнетақы жинақтарын инвестициялау стратегиясын өз бетінше таңдау мүмкіндігі болмаған кезеңде енгізілген. Ол кезде инвестициялық саясатты мемлекет айқындап, инфляция мен нақты инвестициялық табыс арасындағы айырманы өтеу міндетін өз мойнына алған.
Енді салымшыларға зейнетақы активтерін басқаратын компанияны және инвестициялық стратегияны өздері таңдауға құқық берілгендіктен, мемлекеттік кепілдіктің бұрынғы құқықтық және экономикалық негізі өзектілігін жоғалтқан. Министрлік мұндай жағдайда инвестициялық шешімді азаматтың өзі қабылдайтындықтан, оның нәтижесіне мемлекет жауапты болмауы тиіс екенін атап өтті.
Сонымен қатар ведомство мемлекеттік кепілдік бір реттік өтемақы түрінде төленетінін және оның ұзақ мерзімді перспективада тұрақты зейнетақы төлемдерінің мөлшеріне әсер етпейтінін мәлімдеді.
Министрлік ұсынылып отырған өзгерістер мемлекет зейнетақы жинақтарының сақталуына кепілдік беруден бас тартады дегенді білдірмейтінін айтты. Зейнетақы активтерін басқару жүйесі бұрынғыдай көпдеңгейлі мемлекеттік бақылауда қала береді.
