Түймебаев бәрібір ректор болды
Бүгін Білім және ғылым министрі Асхат Аймағамбетов Әл-Фараби атындағы Қазақ Ұлттық университетінің ұжымына су жаңа ректор Жансейіт Түймебаевты таныстырды.
Жансейіт Түймебаевтың ҚазҰУ ректоры болып тағайындалуы «дәретхана дауынан» кейін БАҚ бетінде қызу талқыланды. Осыдан кейін Қазақстан халық ассамблеясы Жансейіт Қансейітұлының Әл-Фараби атындағы ҚазҰУ ректоры болмағанын, әлі де ассамблея төрағасының орынбасары екенін айтып, оның әжетхана тендеріне қатысы жоғын мәлімдеген.
Ақпанның 8-і күні Orda.kz сайты Әл-Фараби атындағы Қазақ Ұлттық университетінің құны 11 миллион теңгеден асатын екі биодәретхана сатып алмап, орнатпақ екенін жазған. Бұл мәселеге назар аударған malim.kz сайты ұлттық университет мемлекеттік сатып алулар порталына биодәретхана сатып алатыны туралы хабарландыруды 5 ақпан күні кешкі сағат 20:05-те ілгенін жазған. Ал бұл уақытта қоғам қайраткері Мұрат Әбенов жоғары оқу орындарындағы ректорлық лауазымға кандидаттарды анықтайтын Республикалық комиссияның отырысы өтіп, Әл-Фараби атындағы Қазақ Ұлттық университетінің ректоры болып Жансейіт Түймебаев сайланғанын әлеуметтік желіде жария еткен. Яғни ұлттық университет жаңа ректор сайлана салысымен мемлекеттік сатып алулар порталына 22 миллион теңгеге дәретхана сатып алатыны жайлы хабарландыру ілген.
22 миллионға дәретхана сатып алуға тапсырыс берген экс ректор Ғалымқайыр Мұтанов па, жоқ әлде су жаңа ректор Жансейіт Түймебаев па? Бұл сұраққа әзірге жауап жоқ. Мүмкін алдағы уақытта екеуі қосылып жауап берер.
Оқи отырыңыз:Әжетхана дауынан кейін Түймебаев ректор болмай қалыпты
Қазақстандағы жаңа ұлт: орыстілді қазақ пен қазақтың арасы алшақтап бара ма?
Ең көп оқылған
