Түймебаевтың ұлын атып өлтірген сарбаз сотталды
Қаңтар оқиғасы кезінде оққа ұшқан Елнар Қансейіттің ісі бойынша әскери қызметкер алты жарым жылға сотталды.
Қаңтар оқиғасы кезінде Әл-Фараби атындағы ҚазҰУ ректоры Жансейіт Түймебаевтың ұлы Елнар Қансейіт әскерилердің оғынан қаза тапқан еді. Бүгін Алматы гарнизонының әскери соты Талдықорғандағы N18404 әскери бөлімінің аға сержанты 33 жастағы Серікбол Мұратхановты «лауазымдық өкілеттігін асыра пайдалану» бабы бойынша алты жарым жылға бас бостандығынан айыруға үкім шығарды.
Сотталушы өзіне тағылған айыпты мойындамайды. Серікбол Мұратхан соңғы сөзінде қару атпағанын, жазықсыз екенін тағы қайталаған.
Ресми мәлімет бойынша, Қаңтар оқиғасында 238 адам қаза тапқан. Олардың көбі 2022 жылы 6 қаңтарда Алматының Республика алаңында әскерилер оғынан өлген деп айтылады. Марқұмдардың туыстары олардың өлімі әлі ашылмағанын айтқан.
Фото ғаламтордан алынды
