13 қазан тарихта адам өмірін сақтап қалған құтқару операциясымен, мәдени жаңалықтармен және қазақстандықтардың жетістіктерімен есте қалған, деп хабарлайды Malim.kz.
1929 жыл: Солтүстік Қазақстан радиосы алғаш эфирге шықты
1929 жылғы 13 қазанда Солтүстік Қазақстанда алғашқы радиохабар таратылды. Биыл бұл оқиғаға 97 жыл толды. Өңірлік радионың қалыптасу тарихы осы күннен басталады.
1958 жыл: оқырман Паддингтон қонжығымен танысты
1958 жылғы 13 қазанда британ жазушысы Майкл Бондтың "Паддингтон есімді қонжық" атты алғашқы кітабы жарық көрді. Кейін бұл кейіпкер балалар әдебиетінен мультфильмдер мен үлкен киноға жол тартты.
Паддингтонның оқиғасы Лондонға келген кішкентай қонжықтың жаңа отбасын табуынан басталады. Оның аңғалдығы мен мейірімділігі талай оқырманның сүйіспеншілігіне бөленді. Биыл алғашқы кітаптың шыққанына 68 жыл толды.
2010 жыл: қазақстандық "Барыс" монетасы екі аталымда жеңді
2010 жылғы 13 қазанда Аустралияның Канберра қаласында өткен Монета сарайлары директорларының конференциясында Қазақстанның "Барыс" монетасы екі марапатқа ие болды.
Ол "Ең әдемі монета" және "Технологиялық жағынан ең сәтті орындалған монета" аталымдарында жеңімпаз атанды. Күмістен соғылған монетаға екі шағын бриллиант орнатылған.
2010 жыл: жер астында 69 күн жатқан 33 кенші құтқарылды
Сол күні Чилидегі Сан-Хосе шахтасында қамалып қалған 33 кеншіні құтқару операциясы сәтті аяқталды. Олар шахта опырылғаннан кейін жер астында 69 күн өткізген.
Құтқарушылар арнайы ұңғыма арқылы капсула түсіріп, кеншілерді бір-бірден жоғары шығарды. Соңғы кенші 13 қазан күні жергілікті уақытпен кешкі сағат 21:55-те жер бетіне көтерілді. Ең қуаныштысы – қамалып қалған 33 адамның барлығы аман шықты.
2016 жыл: Боб Дилан әдебиет бойынша Нобель сыйлығының лауреаты атанды
2016 жылғы 13 қазанда америкалық әнші әрі ән авторы Боб Диланның әдебиет бойынша Нобель сыйлығын алғаны жарияланды.
Швед академиясы оның америкалық ән дәстүріне жаңа поэтикалық өрнек әкелген еңбегін бағалады. Бұл шешім ән мәтінінің де әдеби шығарма ретінде қарастырылуына назар аудартты.
2018 жыл: Диас Бахраддин жасөспірімдер Олимпиадасында алтын алды
2018 жылғы 13 қазанда қазақстандық Диас Бахраддин Буэнос-Айресте өткен жасөспірімдер Олимпиадасында жеңіске жетті. Ол каноэнің дара жарысында алтын медаль иеленді. Бұл күн жас спортшының да, Қазақстан құрамасының да жетістіктер тарихына енді.
2020 жыл: Малайзияда Абай атындағы орталық ашылды
2020 жылғы 13 қазанда Куала-Лумпурдағы Ұлттық кітапханада Абай атындағы Қазақ әдебиеті мен мәдениеті орталығы ашылды.
Орталық шетелдік оқырманды Қазақстанның әдебиетімен, тарихымен және мәдени мұрасымен таныстыру мақсатында құрылды. Оған қазақ әдебиетінің кітаптары мен домбыра сыйға тартылды.
