"Болашақ" стипендиясының тағайындалуы, Android платформасының таныстырылуы және Үндістанның Марсқа алғашқы аппаратының ұшырылуы – 5 қарашада болған маңызды оқиғалардың бірқатары. Бұл күн Қазақстан мен әлем тарихында білім, мәдениет және технология саласындағы жаңалықтарымен есте қалды, деп хабарлайды Malim.kz.
1993 жыл – "Болашақ" стипендиясы тағайындалды
5 қарашада қазақстандық жастардың шетелде білім алуына жол ашқан "Болашақ" халықаралық стипендиясы құрылды. Тиісті қаулыда дарынды жастарды АҚШ, Ұлыбритания, Франция, Германия және басқа елдердің жетекші оқу орындарында оқыту көзделді. Бағдарламаның мақсаты – елге қажетті мамандар даярлау және халықаралық білім байланыстарын дамыту. 2026 жылы оның құрылғанына 33 жыл толады.
2007 жыл – Android платформасы таныстырылды
Google және бірқатар технологиялық компания 5 қарашада Android мобильді платформасын әзірлеу туралы жариялады. Оны дамыту үшін Open Handset Alliance бірлестігі құрылды. Жоба телефондарға арналған операциялық жүйені, қолданбалар мен пайдаланушы интерфейсін қамтыды. Бұл хабарландыру кейін смартфондар нарығында кең тараған Android жүйесінің тарихындағы маңызды кезең болды.
2013 жыл – Үндістан Марсқа алғашқы аппаратын ұшырды
5 қарашада Үндістанның Сатиш Дхаван ғарыш орталығынан "Мангальян" аппараты ұшырылды. Бұл елдің алғашқы планетааралық миссиясы еді. Жобаның міндеті – ғарыш аппаратын Марсқа жеткізуге қажетті технологияларды сынау, сондай-ақ ғаламшардың беткі қабаты мен атмосферасын зерттеу. Аппарат 2014 жылы Марс орбитасына жетіп, бастапқыда жоспарланған мерзімнен әлдеқайда ұзақ жұмыс істеді.
2014 жыл – Әзілхан Нұршайықов тұрған үйге ескерткіш тақта орнатылды
Алматыда 5 қараша күні Қазақстанның халық жазушысы Әзілхан Нұршайықовтың құрметіне ескерткіш тақта ашылды. Ол қаламгер 27 жыл тұрған Құрманғазы көшесіндегі үйге орнатылды. Бұл шара жазушының есімін ұлықтап, әдеби мұрасын кейінгі ұрпаққа танытуға арналды.
2016 жыл – Пэк Кон У Қазақстанда алғаш рет өнер көрсетті
Әлемге танымал оңтүстіккореялық пианист Пэк Кон У 5 қарашада "Астана Опера" сахнасында концерт берді. Бұл оның Қазақстандағы алғашқы өнер көрсетуі болды. Пианист дирижер Абзал Мұхитдинов жетекшілік еткен театрдың симфониялық оркестрімен бірге Бетховен мен Рахманиновтың шығармаларын орындады.
2018 жыл – Astana Hub іске қосылды
5 қарашада Қазақстанда Astana Hub халықаралық IT стартаптар технопаркі жұмысын бастады. Бұл оқиға еліміздегі технологиялық кәсіпкерліктің дамуындағы маңызды қадамдардың бірі болды. 2026 жылы технопарктің ашылғанына сегіз жыл толады.
