Теңіз ортасындағы маякқа келген ауысым қызметкері әріптестерінің үшеуін де таба алмаған. Бөлмелер бос, сағат тоқтап қалған. Ал маяктың шамы тазаланып, жағуға дайын тұрған. 1900 жылы болған бұл жұмбақ оқиғаның құжаттары Northern Lighthouse Board ресми сайтында сақталған, деп хабарлайды Malim.kz.
1900 жылғы 26 желтоқсанда маяк қызметкерлерін алмастыруға келген "Гесперус" кемесінің экипажы бірден тосын жағдайды байқаған. Оларды қарсы алуға ешкім шықпаған. Әдеттегі белгі де көрінбеген.
Кеме бірнеше рет дыбыс бергенімен, жауап болмаған. Одан кейін белгі беру үшін зымыран атылған. Бірақ маяк жақтан ешкім көрінбеген.
Ақыры ауысымға келген Джозеф Мур жағаға түсіп, маякқа қарай көтерілген. Ішке кіргенде әріптестерінің орнында жоқ екенін көрген. Бөлмелерді бірінен кейін бірін аралап шыққанымен, ешкімді таппаған.
Маякта Джеймс Дукат, Томас Маршалл және Дональд Макартур есімді үш қызметкер кезекшілікте болған. Олардың қайда кеткенін түсіндіретін нақты белгі табылмаған.
Ғимараттың іші астан-кестен болмаған. Асүй жиналған, ыдыстар жуылған. Маяктың линзасы мен механизмі тазартылып, шамға май құйылған. Қызметкерлер күнделікті жұмысын аяқтап, кешке шам жағуға әзірленгендей көрінген.
Алайда сол кеште шам жанбаған. 15 желтоқсанға қараған түнде маңынан өткен кеменің экипажы да маяк жарығын көрмегенін хабарлаған.
Тексеру кезінде тағы бір жайт назар аудартқан: екі қызметкердің сырт киімі болмаған, ал үшіншісінің пальтосы ғимаратта қалған. Бұл оның сыртқа асығыс шыққан болуы мүмкін деген сұрақ туғызған.
Жұмыс журналы мен ауа райы көрсеткіштері жазылған тақта тексерілген. Соңғы мәліметтер 15 желтоқсанның таңына тиесілі болған. Тергеушілер үш адам сол күні түстен кейін жоғалған болуы ықтимал деп есептеген.
Іздеу барысында жағалаудың бір бөлігінен қатты толқынның іздері табылған. Темір қоршаулар майысып, кей жері орнынан жұлынып кеткен. Ауыр тас та бұрынғы орнынан қозғалған.
Осы деректерге сүйенген тексерушілер қызметкерлер құрал-жабдықтарды бекітуге немесе дауыл келтірген зақымды көруге шыққан кезде, күтпеген алып толқын үшеуін теңізге алып кеткен болуы мүмкін деген қорытынды жасаған.
Дегенмен оқиғаны көрген куәгер болмағандықтан, олардың соңғы сәтте не істегені анықталмаған. Үшеуінің де денесі табылмаған.
Бос қалған маяк пен жоғалған адамдар туралы оқиға кейін түрлі болжамға арқау болған. Алайда ресми құжаттарда тылсым күштің қатысы дәлелденбеген. Негізгі болжам – теңіздегі қайғылы жағдай. Жұмбақ күйінде қалғаны – үш қызметкердің сол күні неліктен бірге сыртқа шыққаны және нақты қалай қаза тапқаны.
