Амур жолбарыстары Ресейден Қазақстанға жеткізіледі
Бірінші кезеңде Қазақстанда оңалту орталығында өскен төрт жолбарысты шығару жоспарлануда
Амур жолбарыстарын Ресейден Қазақстанға әкеліп реинтродукциялау жобасы бойынша келіссөздер жүргізіліп жатыр. Ресей әдістеме әзірлеп, жолбарыстарды тапсыруға әзір.
Бұл туралы «Амур жолбарысы» орталығының бас директоры Сергей Арамилев РИА Новости агенттігіне берген сұхбатында айтты.
2022 жылы Шығыс экономикалық форумында Ресей мен Қазақстан жолбарыстарды Қазақстанға қайтару туралы келісімге қол қойды және олардың біразы Приморьеден жеткізілуі мүмкін.
Ресей президенті Владимир Путин Қазақстан Ресей тәжірибесінің көмегімен 2025 жылға қарай жолбарыстарды Орталық Азияға қайтара алатынына сенім білдірді.
Арамилевтің айтуынша, бірінші кезеңде Қазақстанда оңалту орталығында өскен төрт жолбарысты шығару жоспарлануда.
«Жоба қазір тоқтап тұр. Ресей өз міндеттемелерін орындады, әдістеме әзірледі және далада еркін жүрген гені таза жолбарыстар қоры бар. Біз жануарларды Қазақстанға қысқа мерзімде тапсыру үшін дайындауға дайынбыз... Келіссөздер штаттық режимде жалғасуда», - деді Арамилев.
Сондай-ақ ол БАҚ-та Голландия хайуанаттар бағынан алынған жолбарыстарды пайдалану мүмкіндігі туралы ақпарат пайда болғанын айтты. Оның пікірінше, бұл жобаны жүзеге асыруды қиындатады.
«Бұл бастама жүзеге асырыла қоймас деген үміттеміз. Мұнда экологиялық мәселелермен қатар саяси мәселелер де бар, біз биліктің шешімін күтеміз», - деп қосты ол.
Арамилев жобаның басты қиындығы Қазақстандағы жолбарыстардың табиғи мекендеу ортасын, әсіресе кең жайылымдар жағдайында қайта құру екенін атап өтті. Негізгі міндет – жолбарыстың малға шабуылының алдын алу және адамдармен кездесу мүмкіндігін азайту.
Фото: adme.ru
