Бейжіңдегі Қазақстанның мәдени орталығында қазақтың ұлы ақыны Жамбыл Жабаевтың туғанына 180 жыл толуына арналған "Жамбыл – ғасыр ақыны" атты мәдени кеш өтті, деп Malim.kz хабарлайды.
Іс-шараға Алматы облысы әкімінің бірінші орынбасары Қанат Есболатов, ақынның немересі әрі Жамбыл Жабаев атындағы әдеби-мемориалдық музейдің директоры Салтанат Жамбылова, қытайлық жазушы және аудармашы Акбар Мәжит қатысты.
Сондай-ақ кешке Қазақстанның Қытайдағы Елшілігінің дипломаттары мен ҚХР-дың шығармашылық, ғылыми және іскерлік орта өкілдері жиналды.
Шара аясында Жамбыл Жабаевтың өмірі мен шығармашылығына арналған арнайы көрме ұйымдастырылды. Экспозицияға ақынның кітаптары мен фотосуреттері, бейнелеу және сәндік-қолданбалы өнер туындылары, сондай-ақ этнографиялық жәдігерлер қойылды.
Мәдени бағдарлама "Жамбыл – ғасыр ақыны" атты концертпен жалғасты. Сахнада Сүйінбай атындағы Алматы облыстық филармониясының өнерпаздары өнер көрсетті.
