АҚШ Ресейдің мұнай өнеркәсібіне қарсы ең қатаң санкцияларын енгізді

Америка Құрама Штаттары Ресейдің мұнай экспортына қатысты теңдессіз санкциялар енгізілгенін жариялады. KazService телеграм-арнасының жазуынша, бұл жолғы шектеулер ең ірі компаниялар, кемелер, трейдерлер мен сақтандырушыларды қамтып, Ресей мұнайының әлемдік нарыққа жеткізілуіне елеулі кедергі тудыруы мүмкін, деп хабарлайды Malim.kz.

Санкциялар Ресейдің ең ірі мұнай компанияларына — «Газпром нефть» және «Сургутнефтегазға» қатысты енгізілген. Бұдан басқа, 183 кеме, соның ішінде санкцияларды айналып өту үшін қолданылған «көлеңкелі флот» та қамтылған. Сондай-ақ, мұнай экспортын белсенді түрде жүзеге асыратын ондаған мұнай трейдерлері де санкцияларға ұшыраған.

Санкциялар Ресейдің сақтандырушыларына да қатысты, мысалы, «Ингосстрах» және «АльфаСтрахование» компаниялары тізімге ілінген. Олар Үндістанға және басқа елдерге мұнай тасымалдаған кемелердің көпшілігіне сақтандыру қызметтерін көрсететін еді. Бұл шешім мұнай экспортын қиындатады, өйткені ол кемелердің иелері мен сатып алушылар үшін тәуекелдерді арттырады.

Сонымен қатар, ресейлік компаниялардың топ-менеджерлеріне қатысты да жеке санкциялар салынған. Олардың арасында «Газпром нефть» басшысы Александр Дюков, «Сургутнефтегаз» басшысы Владимир Богданов, «Татнефть» бас директоры Наиль Маганов, «Росатом» бас директоры Алексей Лихачев, басқа да жоғары лауазымды тұлғалар, оның ішінде Ресей энергетика министрінің орынбасарлары бар.

Ресей мұнайын негізгі сатып алушылар — Үндістан мен Қытайға мұнай жеткізу үздігуі мүмкін. Үндістанның мұнай өңдеу зауыттары санкцияға ұшыраған кемелермен немесе ресейлік компаниялармен сақтандырылған мұнайды қабылдаудан бас тартатынын мәлімдеген.

Осыған байланысты Ресейдің мұнай бағасын төмендетуі ғажап емес. Себебі батыс елдері қойған баға шегіне сәйкес келуі керек. Бұл экспорттық көлемдерді сақтау үшін мұнайдың баррелін 60 доллардан төмендетуге әкелуі мүмкін.

Санкциялардың енгізілуі әлемдік мұнай нарығына әсер етіп үлгерген. Шикізат бағасы өсіп, баррелі 80 долларға барған. АҚШ бұл уақытта Ресейге қысым жасау мен әлемдік мұнай бағасын қолайлы деңгейде ұстап тұру арасындағы тепе-теңдікті сақтауға ұмтылып отыр. Себебі қосымша экономикалық дағдарыс болғаны оларға қажет емес.

Фото: pixabay.com