АҚШ Сириядағы «Ислам мемлекетінің» лагерьлеріне соққы берді

Осы аптада АҚШ әскери күштері Сирияның шөл даласына орын тепкен «Ислам мемлекетінің» бірнеше лагеріне әуеден шабуыл жасады. Нәтижесінде 35 содырдың көзі жойылды.

Бұл туралы сәрсенбіде АҚШ Орталық қолбасшылығы (CENTCOM) хабарлады.

Қолбасшылықтың мәлімдеуінше, соққылардың мақсаты - «Ислам мемлекетінің» жоғары дәрежелі көшбасшылары. Бұл ұйымды Америка Құрама Штаттары террористік деп таныған.

CENTCOM мәліметтері бойынша, бейбіт тұрғындар арасында зардап шеккендер жоқ.

Бұл шабуылдар - АҚШ пен оның одақтастарының «Ислам мемлекетінің» жедел әлеуетін әлсіретуге бағытталған күш-жігерінің бір бөлігі. Оның мақсаты - болашақта бейбіт тұрғындарға, Америка Құрама Штаттарына және олардың аймақтағы одақтастары мен серіктестеріне қарсы жасалатын шабуылдардың алдын алу.

АҚШ әскери күштері Сириядағы «Ислам мемлекетінің» лагерлеріне осы айда екінші рет соққы жасап тұр. Мәселен, бұған дейін CENTCOM 11 қазандағы шабуыл туралы хабарлаған болатын.

Фото: antikor.com.ua