Атырау облысы Жылыой ауданында бірнеше күн бұрын аңға шығып, хабарсыз кеткен ер адамның денесі табылды, деп хабарлайды Malim.kz.
Марқұм 1964 жылы туған. Оның мәйіті қамыс басқан аумақтан анықталғаны белгілі болды.
Еске сала кетсек, ер адам 15 желтоқсаннан бері із-түзсіз жоғалған. Оны іздеуге облыстық Төтенше жағдайлар департаменті мен полиция қызметкерлері, сондай-ақ марқұмның туыстары мен жақындары жұмылдырылған.
Облыстық ТЖД мәліметінше, іздеу-құтқару жұмыстары шамамен 100 шақырым аумақта жүргізілген. Операцияға 43 адам, 11 арнайы техника, үш ұшқышсыз ұшу аппараты және EC-033 тікұшағы тартылған. Сонымен қатар қажет болған жағдайда қосымша күштерді жұмылдыру да жоспарланған.
Алдын ала мәлімет бойынша, ер адам 14 желтоқсанда үйінен шығып, Ботақан кен орны маңында жоғалып кеткен. Бұл аумақ Құлсары қаласынан 65 шақырым, ал Атырау қаласынан шамамен 100 шақырым қашықтықта орналасқан.
Қазіргі уақытта құқық қорғау органдары оқиғаға байланысты тексеру жұмыстарын жүргізіп жатыр. Тергеу мүддесіне байланысты оқиғаның нақты мән-жайы әзірге жарияланған жоқ.
