Бір компанияда он жылдан астам уақыт жұмыс істеген әйел жұмысқа қайта-қайта кешіккені үшін қызметінен айырылды. Алайда жұмыс беруші мәселе осымен аяқталды деп ойлағанымен, қызметкер сотқа жүгініп, нәтижесінде шамамен 27 мың доллар өтемақы алуға мүмкіндік алды, деп хабарлайды Malim.kz.
Оқиғадағы ең таңғаларлығы – әйелдің жұмысқа бір-екі рет емес, 176 рет кешіккені.
Ол 2012 жылдың желтоқсанынан бастап көз клиникасында оптометрист болып жұмыс істеген. Қызметкердің жұмыс уақыты таңғы 9:00-ден 13:30-ға дейін және түстен кейін 15:30-дан 19:30-ға дейін белгіленген.
Алайда компанияның жұмыс уақытын тіркеу деректеріне сәйкес, қызметкер бірнеше жыл ішінде жұмысқа 176 рет кеш келген. Кешігулердің басым бөлігі бірнеше минутты ғана құрағанымен, жұмыс беруші мұның пациенттерді қабылдауға әсер еткенін алға тартқан. Себебі клиникадағы тексеру процесінің алғашқы кезеңі дәл осы маманның жұмысына байланысты болған.
176 рет кешіксе де, сот неге қызметкерді жақтады?
2023 жылы компания әйелді жұмыстан шығару туралы шешім қабылдайды. Кешігуден бөлек, оған ұжымдық жұмысқа жеткілікті араласпау және жұмыс барысындағы мінез-құлқына қатысты да бірқатар кінә тағылған.
Бірақ іс сотқа жеткенде күтпеген жағдай анықталды.
Судья жұмыс берушінің қызметкердің кешігулерін ұзақ уақыт бойы біліп, оған тиісті тәртіптік шара қолданбағанына назар аударды. Әйелге бұған дейін кешіккені үшін ресми ескерту де, тәртіптік жаза да берілмеген. Компания бірнеше жыл бойы мұндай тәртіпті қабылдап келген соң, бірден жұмыстан шығару тым қатаң шара деп бағаланды.
Нәтижесінде сот жұмыстан шығаруды негізсіз деп таныған. Қызметкерге 24 806 еуро, яғни шамамен 27 мың доллар көлемінде өтемақы төлеу қарастырылды.
