Биліктен «крыша» іздеген Қырғызстан президентінің болашақ күйеу баласы қамалды
Жас жігіт есірткі саудасымен айналысқан деген күдікке ілінді.
Қырғызстанда президент Садыр Жапаровтың немере қарындасының күйеу жігіті қамауға алынды, деп хабарлайды Malim.kz.
Бұл туралы Садыр Жапаровтың баспасөз хатшысы Аскат Алагозов өзінің Facebook-тегі парақшасында жазды.
Президент Садыр Жапаровтың інісінің қызының жігіті құқық қорғау органдарының өкілдерімен ұсталғанын растаймыз, - деді Алагозов.
Мемлекет басшысының баспасөз хатшысы жас жігіттің бойжеткенге ерекше ұсыныс жасау арқылы танылғанын да алға тартты.
Лаззат Нуркожоеваның жігіті оған тікұшақта үйлену туралы ұсыныс білдірген соң танылды. Жас жігіттің негізгі мақсаты өз қызметін жасыру үшін биліктен «крыша» іздеді деуге толық негіз бар, - деп қосты ол.
Kaktus media мәліметінше, Нуркожоеваның сүйіктісі 5 шілде күні қамауға алынған. Қырғызстанның БАҚ өкілдері жігіттің есімі Афтандил Сабырбеков дейді. Қазір ол есірткі саудасымен айналысқан деген күдікпен уақытша ұстау изоляторында отыр.
Фото: culture.akipress.org
