Британиялық жойғыш ұшақтар Польша әуе кеңістігін бақылап жүр
Ұлыбритания Қорғаныс министрлігінің хабарлауынша, екі британдық Typhoon жойғыш ұшағы 9-10 қыркүйекте ресейлік дрондардың Польша әуе кеңістігін бұзуына жауап ретінде НАТО бастаған «Шығыс сақшысы» операциясы аясында алғаш рет Польша аспанын бақылап шықты, деп хабарлайды Malim.kz.
Корольдік ӘӘК жойғыштары жұмаға қараған түні Англияның солтүстік-шығысындағы Линкольншир облысындағы Конингсби базасынан Voyager жанармай құю ұшағының сүйемелдеуімен көтерілді. Олар Польша әуе кеңістігін бақылап, сенбі таңында Англиядағы базаға аман-есен оралды.
Бұған дейін, сенбі күні, Польша әскери қолбасшылығы Украинаға жасалған кезекті жаппай зымырандық және дрондық шабуыл кезінде ел әуе кеңістігін Польша мен оның НАТО бойынша одақтастарының ұшақтары күзеткенін хабарлаған еді.
Ұлыбритания Қорғаныс министрі Джон Хили бұл миссияға қатысты былай деді:
«Бұл демалыс күндері біз Британия үшін шайқасқа қатысқан буынның ерлігін еске аламыз. Сондықтан Корольдік ӘӘК ұшқыштары мен экипаждарының Польшаға ортақ қауіпсіздігімізді қорғауда иық тіресе тұрғаны – ерекше мәнге ие».
Соңғы 1,5 жыл ішінде британиялық Typhoon жойғыштары Польша мен Румыния әуе кеңістігін бірнеше рет патрульдеген. Олар заманауи сенсорлық жабдықтармен және инфрақызыл бағыттау жүйесі бар ASRAAM «әуе-әуе» зымырандарымен жарақтанған. 9-10 қыркүйектегі дрондардың Польшаға енуіне қарсы әрекетке британдық әскерилер қатысқан жоқ.
Қорғаныс министрлігі миссия кезінде түсірілген жойғыш ұшақтардың фотосуреттерін де жариялады.
Фото: MOD
