Эр-Риядта Украина мен АҚШ делегацияларының кездесуі басталды

Сауд Арабиясының астанасы Эр-Риядта Украина мен АҚШ делегацияларының кездесуі басталды, - деп хабарлайды Malim.kz Украина қорғаныс министрі Рүстем Умеровқа сілтеме жасап.

Министрдің айтуынша, тараптар бірқатар күрделі техникалық мәселелерді талқылайды.

"Эр-Риядта америкалық топпен кездесуді бастадым. Украина президентінің еліміз үшін әділ бейбітшілік орнату және қауіпсіздікті қамтамасыз ету жөніндегі тапсырмасын орындаймыз. Күн тәртібінде энергетика мен инфрақұрылым нысандарының қауіпсіздігіне қатысты ұсыныстар бар. Бүгін күрделі техникалық мәселелермен жұмыс істейміз – біздің делегация құрамында энергетика мамандары мен әскери-теңіз және әуе күштерінің өкілдері бар", – деп жазды Умеров Facebook-те.

Қазір Украина мен АҚШ делегациялары үзіліс жариялады.

24 наурызда Эр-Риядта Ресей мен АҚШ делегацияларының кездесуі өтеді

ТАСС агенттігінің хабарлауынша, Ресей делегациясын сенатор Григорий Карасин басқарады. АҚШ тарапы кездесуде медиатор рөлін атқарады.

АҚШ президентінің арнайы өкілі Кит Келлог Эр-Риядтағы Украина мен Ресей арасындағы жанама келіссөздердің қалай өтетінін түсіндірді.

Бұған дейін АҚШ президенті Дональд Трамп Ресей президенті Владимир Путин және Украина президенті Владимир Зеленскиймен "жақсы" қарым-қатынасы бейбіт келіссөздер үшін маңызды екенін атап өткен болатын.

Фото: depositphotos.com