Еуропа қарулы күштері Мәскеумен ықтимал қақтығысқа дайындалып жатыр
Германия Қарулы Күштері НАТО мен Ресей арасындағы ауқымды қақтығыс жағдайында медициналық көмек көрсету жоспарын әзірлеуде. Елдегі ауруханалар күн сайын шамамен 1000 жараланған әскери қызметкерді қабылдауға дайындалып жатыр.
Бұл туралы 22 қыркүйекте Reuters агенттігіне берген сұхбатында бундесвердің Орталық медициналық қызметінің басшысы Ральф Хоффман айтты. Оның айтуынша, күн сайын ауруханаға жатқызылатындар саны ұрыстардың қарқынына және оларға қандай әскери бөлімдер мен бөлімшелер қатысатынына байланысты болады.
Агенттіктің жазуынша, 2022 жылы Ресейдің Украинаға жаппай басып кіруінен кейін Еуропа қарулы күштері Мәскеумен ықтимал қақтығысқа дайындықты жеделдетіп жатыр. Германия да әскери дәрігерлерді дайындауды үздіксіз жетілдіруде, бұл ретте Украинадағы соғыс тәжірибесі ескеріліп отыр. «Украинадағы соғыстың сипаты түбегейлі өзгерді», – деді генерал Хоффман. Ол жарақаттардың оқ жарақаттарынан дрондар мен барлаушы оқ-дәрілердің салдарынан болатын жарылыс жарақаттары мен күйіктерге ауысқанын атап өтті. Оның айтуынша, украиндықтар жараланған сарбаздарды ұрыс алаңынан дрондардың ұшуы салдарынан жылдам эвакуациялай алмай отыр, сондықтан олардың жағдайын тура майдан шебінде ұзақ уақыт бойы тұрақтандыру қажет болады.
Жараланғандарды Германияға эвакуациялау
Жарақат алғандарды тасымалдау үшін неміс әскери күштері аурухана пойыздары мен автобустарын пайдалануды, сондай-ақ әуе арқылы медициналық эвакуацияны кеңейтуді қарастырып отыр. Оларға алғашқы көмек майдан шебінде көрсетіледі, содан кейін емделу үшін негізінен азаматтық ауруханаларға жеткізіледі. Хоффманның пікірінше, шамамен 15 мың аурухана төсегі қажет болады. Ал Германия ауруханаларында жалпы 440 мыңға жуық төсек орны бар. Құрамында шамамен 15 мың қызметкері бар бундесвердің Орталық медициналық қызметі болашақтағы қажеттіліктерге сай кеңейтілетін болады, деп қосты ол.
Мәскеу Солтүстік Атлант Альянсымен соғысқа дайындалып жатқаны туралы ақпаратты жоққа шығарып отыр, алайда НАТО елдері үстінен ұшқан ресейлік ұшақтар мен дрондарға қатысты соңғы оқиғалар эскалация қаупін күшейтіп отыр, деп атап өтеді Reuters. НАТО бұған дейін бірнеше рет Ресейдің алдағы бірнеше жылда, шамамен 2029 жылдан бастап шабуыл жасауға шешім қабылдауы мүмкін екенін ескерткен болатын.
Фото: Thilo Pulpanek/Bundeswehr
