Ресейді әлемдік футболға қайтару – Мәскеу мен Украинаның бейбіт келісімге келуі арқылы жүзеге асуы тиіс және бұл біз қолдауға тиіс нәрсе. Осындай пікірін Халықаралық футбол федерациясының (ФИФА, FIFA) президенті Джанни Инфантино Белградта білдірді. Оның сөздерін 3 сәуір, бейсенбі күні PA Media және dpa агенттіктері таратты.
“Қазір Украинада бейбітшілік орнату бойынша келіссөздер жүріп жатыр, және мен жақын арада келесі кезеңге өтіп, Ресейді футбол аренасына қайтара аламыз деп үміттенемін. Өйткені бұл барлық мәселенің шешілгенін білдіреді”, – деді Инфантино Еуропалық футбол ассоциациялары одағының (УЕФА) жыл сайынғы конгресінде.
“Біз осыны қолдауымыз керек, осы үшін дұға етуіміз керек, өйткені футболдың мәні осында <…> Біз әрдайым футболды адамдарды біріктіру, елдерді жақындастыру үшін пайдалануымыз керек, әсіресе біздің бөлінген әлемімізде”, – деп толықтырды ол.
Фото: Brennan Asplen/Getty Images
