Газада 17 мыңнан аса бала қаза тапқан

Палестина Білім министрлігі 2023 жылғы 7 қазаннан бастап Израильдің әскери әрекеттері салдарынан Газа секторында 17 мыңнан аса баланың қаза тапқанын мәлімдеді, - деп хабарлайды Malim.kz тілшісі "Анадолу" агенттігіне сілтеме жасап. 

Министрліктің айтуынша, балалар мен білім беру мекемелері Израиль шабуылдарының басты нысанасына айналған.

"Оккупациялық күштер мектептерді қиратып, балалардың қауіпсіз білім алуына тосқауыл қойды. Әсіресе Газа секторында, Иерусалимде және Батыс жағалаудағы "С" аймағында оқушылар күнделікті қиындықтарға тап болып жатыр," – делінген мәлімдемеде.

Сонымен қатар, Дженин, Тулькарм, Эль-Халиль (Хеврон) мен Масафер-Ятта аймақтарында да балалардың білім алу құқығы бұзылып отырғаны айтылған.

"Газада 17 мыңнан астам бала көз жұмды – бұл сандардың әрқайсысының артында бір өмір, бір тағдыр, бір балақайдың арманы мен болашағы жатыр. Соған қарамастан, Газа балалары білім алу құқығына берік, себебі бұл – олардың жарқын болашағына апарар жалғыз жол. Министрлік осы құқықты қамтамасыз ету үшін онлайн мектептер сияқты балама тәсілдерді дамытып жатыр", – делінген министрлік мәлімдемесінде.

Палестина деректеріне сәйкес, 2023 жылғы 7 қазанынан бастап Газа секторында қаза тапқандардың 60 пайызы - балалар мен әйелдер.

Фото: un.org