Германия елді қайта біріктірудің 35 жылдығын атап өтті
3 қазанда, жұма күні Саар жерінің астанасы Саарбрюккенде Германияның ұлттық мерекесі – Герман бірлігі күніне арналған негізгі іс-шаралар өтті, деп хабарлайды Malim.kz DW-ге сілтеме жасап.
Биылғы мереке «Болашақ – өзгерістер арқылы» ұранымен ұйымдастырылды. Елдің қайта бірігуінің 35 жылдығына арналған мерекелік іс-шаралар Людвигскирхе шіркеуінде өткен экуменикалық құлшылықпен басталды. Оған Германияның жетекші саясаткерлері қатысты.
Католик және евангелиялық шіркеу өкілдері қоғамдағы ортақ өзгерістерге батылдықпен және сеніммен қарауға шақырды. Трир епархиясының католик епископы Штефан Аккерман: «Өзгерістер – қажет нәрсе. Олар бізге болашаққа жол ашады», – деді.
Ал Рейн аймағының евангелиялық шіркеу жетекшісі Торстен Латцель жақсы болашаққа сену және таптаурын пікірлерге қарсы тұрудың маңызын атап өтті.
2025 жылы Саар федералдық жері Бундесратқа төрағалық етіп отыр, сондықтан дәстүр бойынша 3 қазандағы мерекелік іс-шаралардың қожайыны атанды. Шараларға ел президенті Франк-Вальтер Штайнмайер, канцлер Фридрих Мерц, Бундестаг төрайымы Юлия Клекнер, Бундесрат төрайымы Анке Релингер, сондай-ақ федералдық жерлердің және парламенттің өкілдері қатысты. Бұған қоса, Саарбрюккенге Франция президенті Эмманюэль Макрон арнайы келді.
Қайта бірігу мерекесіне арналған іс-шаралар 2 қазанда басталып, 4 қазанға дейін жалғасады. Мәдени бағдарлама қаладағы 20-дан астам сахна мен алаңда өтуде. 1990 жылдың 3 қазанында болған Германияның қайта бірігуі елді қырық жылдық бөліністен кейін біртұтас етті.
Фото: BeckerBredel/picture alliance
