Иран мен АҚШ арасындағы ядролық келісімге қатысты алғашқы келіссөз қалай өтті?

Оман астанасы Маскат қаласында Иран мен АҚШ арасындағы Тегеранның ядролық бағдарламасына қатысты алғашқы жанама келіссөздер аяқталды, - деп хабарлайды Malim.kz Deutsche Welle-ге сілтеме жасап.

12 сәуірде келіссөздер туралы Иранның Сыртқы істер министрлігі мен делдалдық жасаған Оман Сыртқы істер министрі Бадр аль-Бусаиди мәлімдеді.

Келіссөздерде АҚШ тарапын президент Дональд Трамптың арнайы өкілі Стивен Уиткофф, ал Иран тарапын елдің Сыртқы істер министрі Аббас Аракчи таныстырды.

Аль-Бусаидидің айтуынша, келіссөздер "достық атмосферада" өткен. Ол "аймақтық және жаһандық бейбітшілік, қауіпсіздік пен тұрақтылыққа қол жеткізу үшін бірлесіп жұмыс істеуді әрі қарай жалғастыратынын" айтты.

Ирандық Tasnim агенттігінің журналисі де келіссөздер атмосферасын оң бағалады. Аббас Аракчи Telegram-арнасында тараптар Иранның ядролық бағдарламасы мен санкцияларды алып тастау мәселелеріне қатысты ұстанымдарымен алмасқанын, келіссөздер өзара құрметке негізделген конструктив ортада өткенін жазды. Сондай-ақ ол келесі аптада келіссөздер жалғасатынын мәлімдеді.

"Екі жарым сағаттан аса уақытқа созылған жанама келіссөздерден кейін ирандық және америкалық делегация басшылары сыртқа шығарда Оман сыртқы істер министрінің қатысуымен бірнеше минут тілдесті", – деді Бадр аль-Бусаиди.

Келіссөздер басталар алдында АҚШ Мемлекеттік департаменті бұл кездесудің алғашқы, таныстыру сипатындағы кездесу болатынын, оның нәтижесіне қарай әрі қарайғы қадамдар қабылданатынын хабарлаған.

Бұған дейін Politico басылымы АҚШ президенті келіссөздер нәтижесін көру үшін 60 күндік мерзім белгілегенін жазған. Егер осы аралықта даму болмаса, Вашингтон Тегеранға қатысты әскери шаралар қолдануы мүмкін екені айтылған. Бұл туралы ақпаратты төрт дереккөз растаған.

Алайда кейбір израильдік шенеуніктер мен Республикалық партияның конгрессмендері бұл келіссөздер Иранға тиімді болуы мүмкін деп есептейді. Олардың пікірінше, Тегеран келіссөздерді уақыт созу мен күшін қалпына келтіру үшін пайдаланып отыр.

Наурызда Дональд Трамп Иран келісімге келмесе, елге "бомбалау" және қосымша баж салығын енгізу арқылы қысым жасайтынын айтып, кейін бұл мәлімдемесін тағы қайталаған болатын.

Фото:depositphotos.com