Роботакси алғаш рет апатқа ұшырады: не белгілі?
АҚШ-тың Остин қаласындағы лық толы автотұрақта Tesla компаниясының жүргізушісіз таксиі жол апатына ұшырады, - деп хабарлайды Malim.kz hightech.fm сайтына сілтеме жасап.
Бұл – жаңа қызмет іске қосылғаннан кейінгі тіркелген алғашқы жағдай. АҚШ-тың Жол қозғалысы қауіпсіздігін бақылау ұлттық басқармасы тексеруді бастап кетті.
Маусым айының соңында Tesla компаниясы Техас штатының Остин қаласында жүргізушісіз такси қызметін іске қосқан. Алайда көп ұзамай-ақ әлеуметтік желілерде пайдаланушылар роботаксилердің оғаш маневр жасап, жол ережесін бұзып жатқан видеоларын жариялай бастады. Енді автономды электромобильдің қатысуымен болған алғашқы жол-көлік оқиғасы жайлы ақпарат пайда болды.
Апат Home Slice Pizza мейрамханасының маңындағы автотұрақта орын алған. Dirty Tesla YouTube арнасы оқиға орнынан видео жариялады. Кадрларда Tesla Model Y көлігі жүргізушісіз такси режимінде жұмыс істеп тұрған кезде, тұрақтан шыққанда тұрған Toyota Camry көлігіне соқтығысқаны көрінеді. Жолаушы көліктен түскен соң машина тоқтайды. Бірнеше секундтен кейін көлік кенет алға қарай қозғалып, солға бұрылып, жанындағы автокөлікке соғылады. Қуанышқа орай, адамдар зардап шекпеген.
Көліктің бұл кінәратының себебі әзірге белгісіз. Бұған дейін интернетте Tesla электромобильдерінің автономды жүргізу режимінде қарсы бағыттағы жолаққа шығып кетіп, сол бағытпен жүріп кеткен видеолары жарияланған болатын. АҚШ-тың Жол қозғалысы қауіпсіздігін бақылау ұлттық басқармасы Bloomberg агенттігіне берген мәлімдемесінде видеожазбалар мен Tesla роботаксилерінің әрекетіне қатысты шағымдарды зерттеп жатқанын айтты. Реттеуші орган жол қауіпсіздігін қамтамасыз ету үшін қажетті шараларды қабылдауға уәде берді.
Фото: habr.com
Қазақстандағы жаңа ұлт: орыстілді қазақ пен қазақтың арасы алшақтап бара ма?
Ең көп оқылған
