«Росавиация» Azerbaijan Airlines ұшағына дрондар шабуылдағанын растады

Росавиация Azerbaijan Airlines ұшағы Грозныйға қонатын кезде қалаға дрондар шабуылдағанын растады. Бұл туралы Росавиация басшысы Дмитрий Ядров хабарлады деп жазды Азаттық радиосы ТАСС агенттігіне сілтеме жасап.

Оның сөзінше, лайнер қонатын уақытта Грозный әуежайы маңындағы жағдай «күрделі болған». Украина дрондарының шабуылына байланысты әуежай аспанында «Ковер» жоспары енгізілген, ол маңда қалың тұман болды деді.

Ядровтың айтуынша, ұшақ Грозныйға екі рет қонбақ болған, бірақ қона алмаған, содан кейін пилот Ақтауға қонуды жөн көрген. Ресей тарабы «Қазақстан мен Әзербайжандағы әріптестеріне қайғылы оқиғаны тергеуге дайын екенін дереу хабарлады» деді ол.

«Росавиация» бастапқыда «ұшаққа құстар соғылып, апат содан болуы мүмкін» деп хабарлаған еді. Авиация сарапшылары оған күмән келтірген. 

Еске салайық, 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл – Azerbaijan Airlines әуекомпаниясына тиесілі Эмбраер 190 ұшағы. Алдын ала ақпарат бойынша ұшақ бортында 67 адам, оның ішінде 5 экипаж мүшесі болған.

Фото: nais.ru