Украинада Раданың экс-төрағасы Андрей Парубийді атып кетті
Украина Жоғарғы Радасының бұрынғы спикері Андрей Парубий Львов қаласында өлтірілді. Бұл туралы 30 тамыз, сенбі күні Львов облыстық әскери әкімшілігінің (ӘӘА) басшысы Максим Козицкий Telegram арнасында жазды, деп хабарлайды Malim.kz.
Бұған дейін Украина Ұлттық полициясы Сихов ауданындағы атыс салдарынан 1971 жылы туған "белгілі қоғам және саяси қайраткердің" қаза тапқанын, бірақ атын атамағанын хабарлаған болатын.
Кейін Украина президенті Владимир Зеленский саясаткердің өлімін растады.
"Украина ішкі істер министрі Игорь Клименко мен бас прокурор Руслан Кравченко Львовтегі бұл қорқынышты кісі өлтірудің алғашқы белгілі жайттары жөнінде хабарлады. Андрей Парубий қаза тапты. Жақындары мен туыстарына қайғыра көңіл айтамын", – деп жазды Зеленский.
Сондай-ақ ол қылмыскерді табу үшін "барлық қажетті күш пен құрал жұмылдырылғанын" мәлімдеді.
Алдын ала деректер бойынша, украиналық БАҚ атап өткендей, атысты тамақ жеткізу қызметінің курьері кейпінде жүрген адам ашқан. Журналист Виталий Глаголаның айтуынша, куәгерлер курьерлік Glovo қызметінің қызметкері Рада экс-спикерін атып, тапаншаны сөмкесіне салып, оқиға орнынан электровелосипедпен қашып кеткенін жеткізген.
Оқиға орнынан жеті гильза табылды деп жазды "РБК-Украина". Ал "Укринформ" агенттігіне сілтеме жасаған медицина қызметінің басшысы Парубий дәрігерлер келген кезде тірі болмағанын хабарлаған. "Алған жарақаттары өмірмен үйлеспейтін" деп дәрігерлер қорытынды жасаған.
Андрей Парубий 2013-2014 жылдары Евромайданды ұйымдастыруға белсенді қатысып, сол уақытта "Майданның Өзін-өзі қорғау" құрылымының коменданты болған. 2014 жылдың басында ол Украина Ұлттық қауіпсіздік және қорғаныс кеңесін басқарған, алайда бірнеше айдан соң отставкаға кеткен.
Кейбір украиналық БАҚ деректері, атап айтқанда "Зеркало недели" газеті, бұл шешімді сол кездегі президент Петр Порошенкомен келіспеушіліктермен байланыстырған.
2016 жылдан 2019 жылға дейін Парубий Жоғарғы Рада спикері қызметін атқарып, бірнеше шақырылымда халық депутаты болған.
Фото: picture-alliance/dpa/R. Pilipey
Ең көп оқылған
