Трамп Украинаға Қытайдан бітімгерлер жіберуді ұсынды
Трамп соғыстан кейін Украинадағы майдан сызығы бойындағы бейтарап аймақты бақылау үшін қытайлық әскерді тарту идеясын Еуропа көшбасшыларымен Ақ үйде өткен кездесуде ұсынған, деп хабарлайды Malim.kz DW-ге сілтеме жасап.
АҚШ президенті Дональд Трамп соғыс аяқталған соң Украинаға қытайлық әскерді бітімгер ретінде орналастыру қажет деп санайтынын жұма күні, 29 тамызда, Financial Times-ке сілтеме жасап жазды. Басылымның мәліметінше, Трамп осылайша Ресей президенті Владимир Путиннің ұсынысын қолдаған.
Басылым сұхбаттасқандардың айтуынша, 18 тамызда Ақ үйде Украина президенті Владимир Зеленский және Еуропа көшбасшыларымен кездесуде Трамп Қытайдан 1300 шақырымдық майдан сызығы бойындағы бейтарап аймақты бақылау үшін бітімгерлер жіберуді сұрауды ұсынған.
Ақ үй мұндай идея талқыланды дегенді жоққа шығарды. “Бұл – жалған”, – деді FT-ке Трамп әкімшілігінің жоғары лауазымды өкілі.
Ресей тарапы қытайлық бітімгерлер туралы мәселені алғаш рет 2022 жылдың көктемінде Стамбұлда өткен Ресей мен Украина арасындағы алғашқы келіссөздерде қауіпсіздік кепілдіктері аясында көтерген. Axios дерегінше, Путин 15 тамызда Аляскада Трамппен кездесуінде Қытайды Украина қауіпсіздігінің ықтимал кепілгерлерінің бірі ретінде атаған.
Фото: Andrew Caballero-Reynolds/AFP
Ең көп оқылған
