Қазақстанның Украинадағы елшілігі қазақстандықтарға үндеу жасады, деп хабарлайды Malim.kz.
Шиеленістің күшеюіне байланысты және қауіпсіздік мақсатында Қазақстан Республикасының Украинадағы Елшілігі Қазақстан азаматтарына Украина аумағынан кету мүмкіндігін қарастыруды ұсынады.
Украинадан Қазақстанға бару үшін Қазақстан Республикасының азаматтары Польша немесе Молдова арқылы жерүсті бағыттарын пайдалана алады. Ол жаққа жетіп алғаннан кейін әрі қарай коммерциялық әуе қатынасын пайдаланса болады.
"Польша арқылы кеткен жағдайда Қазақстан азаматтарында Шенген визасы болуы қажет. Молдоваға кіру үшін виза қажет емес. Сонымен қатар елшілік барлық азаматтарды әуе шабуылы туралы ескертуге назар аударып, барынша жасырынуға, сондай-ақ қауіпсіздік шараларын сақтауға және ресми органдардың ұсыныстарын орындауға шақырады", - делінген хабарламада.
Елшіліктің консулдық бөлімінің байланыс телефондары: +38 (044) 4831596, +38(044) 4891031.
Қазақстан азаматтарына арналған жедел желі (төтенше жағдайда): +380673470408.
Айта кетейік, күні кеше Украинадағы Полтава әскери институтына баллистикалық зымырандармен екі рет шабуыл жасалып, кемінде 50 адам қаза тапқан болатын. Тағы 271 адам жарақат алды. Сонымен қатар телекоммуникация институтының ғимараттарының бірі жартылай қирап, адамдар үйінділердің астында қалды.
Фото: Reuters
Байланысты жаналықтар
MalimBlocks
