Танымал TikTok видеоплатформасы Еуропа пайдаланушыларының деректерін Қытай билігіне бергені үшін 530 миллион еуро көлемінде айыппұл төлеуі тиіс, деп хабарлайды Malim.kz.
Бұл туралы 2 мамыр, жұма күні Еуроодақ атынан сөйлеген Ирландияның деректерді қорғау жөніндегі комиссиясы (DPC) мәлімдеді.
TikTok бұл шешімге шағым түсіретінін хабарлады.
DPC төрағасының орынбасары Грэм Дойлдың айтуынша, TikTok компаниясы ЕО аумағындағы жеке деректерді қорғау деңгейіне тең дәрежеде қауіпсіздік кепілдігін қамтамасыз ете алмаған. Ол сонымен қатар TikTok Қытайдың терроризм мен тыңшылыққа қарсы заңдарына сәйкес, Қытай билігінің еуропалық пайдаланушылар деректеріне қол жеткізу қаупін ескермегенін айтты.
DPC бұл істі 2021 жылы тергей бастаған. Тергеу аяқталуға жақын қалған сәуір айында TikTok кенеттен еуропалық пайдаланушылардың деректері Қытайда сақталғанын, бірақ кейіннен жойылғанын мәлімдеген. 530 миллион еуро көлеміндегі айыппұл — комиссия тарихындағы ең ірі жазалардың бірі саналады. Компанияға өз қызметін ЕО талаптарына сәйкестендіру үшін алты ай уақыт берілді.
Фото: IMAGO/Pond5 Images
