Трамп 30 мың мигрантты қамайтын орталық құрып жатыр
Трамптың айтуынша, босқындарды өз елдері де қабылдамайды
Трамп мигранттарды Гуантанамоға жіберуді көздейді. Кубадағы Әскери-теңіз күштерінің америкалық базасында 30 000-ға жуық мигрантты қамауға алатын арнайы орталық құрылады. Онда түрме де бар.
Нысанда "америкалықтарға қауіп төндіретін қылмыскерлерді" орналастыру жоспарланған, деп мәлімдеді Трамп. Айтуынша, кейбіреулері " соншалықты оспадар", сондықтан шыққан елдері олардың оралуын қаламайды.
Трамптың шекараны қорғау жөніндегі комиссары Том Хоман арнайы орталық мигранттарды ұстауға пайдаланылатынын және алдағы уақытта оны кеңейтетінін айтты. Гуантанамода мигранттарға арналған түрме бар, ол терроризмге күдікті шетелдіктер үшін қатаң режимдегі колониядан бөлек.
Кубадағы арнайы орталықты 2002 жылы АҚШ-тың сол кездегі президенті Джордж Буш 2001 жылғы 11 қыркүйектегі лаңкестік шабуылға күдікті шетелдік содырларды ұстау үшін құрды. Түрмеде қазір 15 тұтқын отыр.
Американың экс- президенттері Барак Обама мен Джо Байден түрмені жабу туралы бірнеше рет мәлімдеген болатын. Бірақ олар тек тұтқындардың санын ғана азайтты. Гуантанамодағы түрме тұтқындарды азаптау және олардың құқықтарын бұзу бойынша жиі аталады.
Фото: bbc.com
