Трамп Иранға соққы беру жоспарын мақұлдады

АҚШ шабуыл жасайтын жағдайда басты нысана – Иранның Фордо қаласындағы уран байыту зауыты болады, деп хабарлайды Malim.kz dw.com сайтына сілтеме жасап.

АҚШ-тың Иранға соққы жасау жоспары бекітілгенімен, Дональд Трамп оны орындауға әзірге бұйрық бермеген. Ақ үй Иранның ядролық бағдарламадан жақын арада бас тартады деп күтуде, деп жазады The Wall Street Journal газеті.

АҚШ президенті Дональд Трамп Иранға әскери соққы беру жоспарын мақұлдаған, алайда оны іске асыру туралы бұйрық берген жоқ. Бұл туралы 19 маусым, бейсенбі күні The Wall Street Journal (WSJ) басылымы хабарлады, дереккөздерге сілтеме жасай отырып. Олардың айтуынша, Ақ үй басшысы әлі де Тегеран ядролық бағдарламадан бас тартады деп үміттеніп отыр.

Егер шабуыл жасалса, АҚШ-тың басты нысанасы – Фордо қаласындағы уран байыту зауыты болады. Бұл нысан таудың астына жасырылған және әскери сарапшылардың пікірінше, ол тек ең қуатты бомбалар – GBU-57A арқылы ғана жойылуы мүмкін. Бұл бомбаларды алып жүре алатын жалғыз ұшақ – B-2 Spirit деп аталатын "көрінбейтін" бомбалаушы ұшақ, ол тек АҚШ қарулы күштерінің қару-жарағында бар.

Сонымен қатар, Axios басылымы Ақ үйдегі дереккөздерге сілтеме жасап хабарлағандай, Дональд Трамп операцияны бастамас бұрын, АҚШ-та бар бункерге қарсы бомбалардың бұл зауытты жоюға нақты кепілдік беретініне көз жеткізгісі келеді. Бұдан бөлек, Трамп тек нүктелі соққылармен шектеліп, Таяу Шығыстағы ұзаққа созылатын соғысқа араласқысы келмейді.

Ал Bloomberg агенттігінің жазуынша, АҚШ-тың жоғары лауазымды тұлғалары Иранға қарсы соққы жасауға алдағы күндері дайындалып жатыр. Ал Трамп бұл мәселеге қатысты қоғамдық түрде нақты ұстаным білдірмей отыр. Кеше Ақ үйдің Жағдай бөлмесінде әскери басшылықпен кеңес алдында Трамп журналистерге Иранға қатысты түпкілікті шешім әлі қабылданбағанын, бірақ "не істеу керегі туралы ойлар бар" екенін айтты. "Маған шешімді соңғы секундта қабылдаған ұнайды, өйткені соғыс кезінде бәрі өзгеріп жатады", – деді ол. Сондай-ақ Трамп Иранмен қақтығысқа араласқысы келмейтінін, бірақ Тегеранның ядролық қаруға ие болмауы тиіс екенін атап өтті.

Бұған дейін Трамп Ираннан "түгелдей тізе бүгуді" талап етіп, бұл талабын "соңғы ультиматум" деп атаған. Оның айтуынша, АҚШ Иранның әуе кеңістігін толық бақылауда ұстап отыр, тіпті аятолла Али Хаменеи қайда жасырынғанын да біледі. Трамп оны "оңай нысана" деп атады, бірақ АҚШ әзірге оны өлтіруді жоспарлап отырмағанын жеткізді.

Жауап ретінде Хаменеи Иран ешқашан тізе бүкпейтінін және АҚШ президентінің талаптарын қабылдамайтынын мәлімдеді. "Кез келген америкалық әскери шабуыл ауыр және орны толмас салдарға әкеледі. Иран мәжбүрлі соғысқа қалай табанды түрде қарсы тұрса, мәжбүрлі бейбітшілікке де солай қарсы тұрады. Иран ешқандай қысым алдында бас имейді", – деді Аятолла. 

Фото: Nathan Howard / Reuters