Трамп уәде еткен 20 мың зымыранды бермеді - Зеленский

Украина президенті Владимир Зеленский жексенбі күні америкалық ABC News телеарнасына берген сұхбатында, АҚШ әу баста Украинаға бермек болған зымырандарды Таяу Шығысқа жөнелткенін мәлімдеді. Бұл туралы Azattyq сайтына сілтеме жасап Malim.kz хабарлайды.  

Зеленскийдің айтуынша, Киев пен АҚШ-тың алдыңғы әкімшілігі арасында Ресейдің дрондарына қарсы күресу мақсатында Украинаға 20 мың зымыран жеткізу туралы келісім болған.

"Біз осы 20 мың зымыранға үміт арттық. Бүгін таңертең менің қорғаныс министрім бұл зымырандардың Таяу Шығысқа жіберілгенін хабарлады", – деді Украина басшысы. Алайда ол бұл зымырандардың нақты қай елге жөнелтілгенін, сондай-ақ олардың Украинаға жеткізілуі туралы ресми келісім жасалғанын не ауызша уағдаластықпен шектелгенін нақтыламады.

Бұған дейін, 5 маусымда The Wall Street Journal басылымы АҚШ Қорғаныс министрлігінің құжаттарына сүйене отырып, бастапқыда Украинаға жіберілуі тиіс болған дронға қарсы қарудың Таяу Шығыстағы америкалық әскери күштерге бағытталғанын жазған. Басылым мәліметінше, бұл шешім туралы Пентагон Конгреске құпия түрде хабарлаған.

АҚШ әкімшілігі әзірге бұл мәлімдемелерге — не WSJ мақаласына, не Зеленскийдің сөзіне  ресми жауап берген жоқ.

Сұхбат барысында Зеленский АҚШ-тың бұрынғы президенті Дональд Трамппен қарым-қатынасын "қалыпты кәсіби деңгейде" деп сипаттады. Оның айтуынша, Трамппен жеке байланысы жоқ, өйткені олар сирек сөйлеседі. Бірақ Ватикандағы 15 минуттық жеке кездесу екіжақты қарым-қатынасты жақсартуға сеп болды және ол "ақпан айында Ақ үйде өткен кездесуден де нәтижелі" болғанын атап өтті. Айта кетейік, аталған ақпандағы кездесуге АҚШ вице-президенті Джей Ди Вэнс және басқа да әкімшілік өкілдері қатысқан. Сол жолы Зеленский мен Трамп арасында келіспеушіліктер туындағаны да хабарланған.

Зеленский сұхбатта Дональд Трампты Ресейге қарсы санкцияларды күшейтуге қайтадан үндеді. Ол Украина АҚШ әкімшілігінің барлық талаптарын орындағанын, соның ішінде атысты алдын ала шартсыз тоқтатуға және Ресеймен Стамбұлда келіссөздер жүргізуге келісім бергенін еске салды.

Зеленскийдің сөзінше, Еуропа елдері Трампты "еркін әлемнің көшбасшысы" ретінде көреді және оған: «Көшбасшы болуыңды өтінеміз. Сен – көшбасшысың. Путинді тоқтат, біз саған көмектесеміз. Өйткені Еуропа Америкадай қуатты емес», – деп үн қатып отыр.

Дональд Трамп бұған дейін бірнеше рет Ресей мен Украина арасындағы соғысты тоқтатқысы келетінін мәлімдеген. Ол Ресей президенті Владимир Путин мен Украина президенті Владимир Зеленскийді соғысты тоқтату үшін жеткілікті әрекет жасамай отыр деп сынға алған. Сонымен қатар Трамп Ресейге қарсы санкцияларды күшейту немесе күшейтпеу туралы әзірге нақты шешім қабылдамағанын айтқан.

Сол күні, 8 маусымда, АҚШ вице-президенті Джей Ди Вэнс те мәлімдеме жасап, АҚШ-тың бұрынғы әкімшілігі Украинаға қолдау көрсету үшін елеулі көлемде қаржы жұмсағанын атап өтті. "Мен басқыншылықты ақтамаймын және соғыс бастау әрекетін қолдамаймын", – деді ол. Алайда қазіргі ең маңызды мәселе – соғысты тоқтатуға тырысу екенін жеткізді.  

Фото: BBC