Түркияда аза тұту күні жарияланды
Тау-шаңғы демалыс орнындағы өрттен опат болғандар саны 76-ға жетті
Түркияның Болу провинциясындағы тау-шаңғы демалыс орнындағы өрттен опат болғандар саны 76-ға жетті. Бұл туралы бауырлас елдің Ішкі істер министрі мәлімдеді,- деп хабарлайды Malim.kz.
Көз жұмған 52 азаматтың есімі анықталды. Оқиғаны тергеу барысында 9 күдікті ұсталды. Бүгін Түркияда ұлттық аза тұту күні жарияланды. Түрік жұрты қара жамылды.
Президент Реджеп Тайип Ердоған қаза тапқандардың отбасыларына көңіл айтып, кінәлілердің лайықты жазасын алатынына сендірді.
Өрт туралы хабар жеткен бойда аймаққа министрлер мен жауапты адамдарды жібердік. Қызыл жалынның шығу себебі мен кінәлілерді анықтау үшін тергеу амалдары басталды. Оқиға бүге-шігесіне дейін зерттеліп жатыр. Осы қайғылы оқиғаға себепкер болғандар заң алдында жауап береді. Сыздаған жүрегіміздің жарасын сипаттауға сөз жетпейді. 1 күндік ұлттық аза тұту жарияланды. Бүгін елімізде және шетелдегі өкілдіктерімізде туларымыз төмен түсіріледі",-деді ол. Өрт Түркия уақытымен шамамен түнгі сағат 3 жарымда демалушылар терең ұйқыда жатқан кезде 12 қабат ғимараттың төртінші қабатындағы асханада тұтанған. Бұл елде қазір мектептерде демалыс. Оның үстіне елде шаңғы тебу маусымы. Қонақүйде 234 адам болған. Билік бастапқыда құрбан болғандар санын 10 кісі деп жариялады. Өрттің шығу себебін 6 прокурор анықтап жатыр. 9 күдіктінің арасында қонақүй иесі бар. Елдің ішкі істер министрінің айтуынша, өрт себебі 10 күннің ішінде анықталуы керек.
Фото: trt.avaz
