Ыстамбұлдың экс-мэріне қатысты сот жазға қалдырылды

Ыстамбұл мэрі Экрем Имамоғлуна қатысты сот процестері биылғы жазға шегерілді, - деп хабарлайды Malim.kz тілшісі dw.com сайтына сілтеме жасап.

Сотқа екі іс бірдей шегерілді: бірі — бас прокурор Агын Гюрлекке "қорқыту" ісі, екіншісі — оның Бейликдүзү ауданында әкім болып тұрған кездегі "тендерлік манипуляция" ісі.

Бірінші іс бойынша сот отырысы 16 маусымда, ал екіншісі 11 шілдеде өтеді.

Еске салайық, Ыстамбұл мэрі мен оның жақтастарын 19 наурызда ұстаған. Олар 4 күн бойы полиция бөлімшесінде болады деп жоспарланған. Имамоғлуға сыбайлас жемқорлық, пара алу және сатып алу істеріне қатысы бар деген айып тағылған.

Мэр мен оның серіктері ұсталғаннан кейін Ыстамбұлда жаппай тәртіпсіздіктердің алдын алу үшін 4 күнге наразылық акцияларына тыйым салынған. Қалада көлік қозғалысы мен кейбір метро желілерінің жұмысы шектелген. Кейін бүкіл Түркия бойынша жаппай наразылықтар басталған. Қазір де бұл шерулер жалғасуы мүмкін деп күтіліп отыр.

Бұған дейін Түркия Бас прокуратурасы Ыстамбұл университетіне Имамоғлуның "бизнес басқару" мамандығы бойынша дипломының түпнұсқалығы мен заңдық күшін тексеру үшін ресми сұрау жолдаған. Себебі Солтүстік Кипрдегі университеттен Ыстамбұлға ауысу кезінде заңбұзушылықтар болуы мүмкін деген күдік бар. Ол кезде аралдағы оқу орны Түркия тарапынан ресми танылмаған. Бұл мәселеге байланысты Имамоғлу түсініктеме берген. 17 наурыз күні Ыстамбұл университеті оның дипломын жарамсыз деп таныған. Бұл шешім оның президенттік сайлауға қатысуына кедергі келтіруі мүмкін.

Фото: turkeytribune