Украина президенті Владимир Зеленский Түркиядан ұшып кетіп, Албания астанасы Тиранаға келді, - деп хабарлайды Malim.kz Ukrinform-ға сілтеме жасап.
Зеленский 16 мамырда Еуропалық саяси қауымдастық саммитіне қатысады.
"Иә, президент саммитке қатысу үшін Албанияға кетті", – деді Украина президентінің баспасөз хатшысы Сергей Никифоров.
Еуропалық саяси қауымдастық саммиті
Айта кетейік, саммитке Ұлыбритания премьер-министрі Кейр Стармер, Франция президенті Эммануэль Макрон, Германия канцлері Фридрих Мерц және Түркия президенті Режеп Тайып Ердоған да қатысады.
Іс-шара барысында Ресейге қысымды күшейту және Түркияда кейінге шегерілген келіссөздерден кейін қосымша санкциялар енгізу мәселесі талқыланады.
ЕО 2022 жылы Ресейден импортқа кедендік баж салығын енгізгенімен, әлі күнге дейін сауда тыйым салудан тартынған. Бұл жолы бұл тақырып нақты қаралмақ.
ЕО өкілдері Ресейге қарсы 17-ші санкциялар пакетін дайындап қойған. Ол мұнай мен газ экспортына шектеулерді айналып өту үшін қолданылып жүрген "көлеңкелі флоттың" шамамен 200 кемесіне қатысты шараларды қамтиды.
Сондай-ақ, ЕО өз компанияларына үшінші елдер арқылы санкцияларды айналып өтіп жатқан шамамен 30 ұйыммен іскерлік байланыс орнатуға тыйым салмақ. Санкциялық тізімге Ресейдің әскери машинасына қатысы бар 75 жеке және заңды тұлға да енгізілген.
Бұл санкциялар пакетін ЕО-ның қорғаныс және сыртқы істер министрлері 20 мамырда түпкілікті бекітеді деп күтіледі.
Бұған дейін не болған еді?
11 мамырға қараған түні Ресей президенті Владимир Путин Украинаға алдын ала шарттарсыз тікелей келіссөздерді қайта бастауды ұсынды. Ол 15 мамырда Ыстамбұлда кездесуді ұсынған.
Украина президенті Владимир Зеленский де бұл ұсынысқа келісіп, сол күні Түркияға келіп, Ресей президентін жеке өзі күтетіні туралы мәлімдеген.
Ресей делегациясы келіссөздерге дайындалып, құрамын бекітіп Түркияға барғанымен, 15 мамырда Ыстамбұлда кездесу өтпеді. БАҚ мәліметінше, келіссөздер 16 мамырда басталуы мүмкін.
АҚШ-тың бұрынғы президенті Дональд Трамп бұған дейін Украинадағы бейбіт келіссөздерде ешқандай прогресс болмайтынын, тек өзі Путинмен тікелей кездескен жағдайда ғана өзгеріс болуы мүмкін екенін айтқан.
Фото: Hakan Nural/Anadolu via Getty Images
