Алматыда ІІМ киберқылмысқа қарсы іс-қимыл бөлімшесі жалдамалы пәтерде таяу шет елдердің бірінің азаматын ұстады, деп хабарлайды Malimkz.
Үй-жайды тексеру барысында жедел уәкілдер үш sim-box құрылғысын тапты. Олардың әрқайсында 32 sim-карта слоты болған. Сондай-ақ, әр түрлі ұялы байланыс операторының екі мыңға жуық sim-картасы тәркіленді.
Құрылғылардың көмегімен қазақстандықтарға алаяқтық қоңыраулар жасалған. Шетелдік азаматтың біздің елге былтыр желтоқсан айында келіп, алаяқтық әрекеттер жасау үшін аталмыш жабдықтарға қызмет көрсетумен айналысқаны анықталды. Қылмыстық іс қозғалды. Күдікті уақытша ұстау изоляторына қамалды, - деді ІІМ киберқылмысқа қарсы іс-қимыл департаментінің бастығы Жандос Сүйінбай.
Фото: polisia.kz
