Шымкент қаласының әлеуметтік құрылыс бөлімінің бұрынғы басшысы Бақыт Қалымбетов әкімнің орынбасарына жаңа IPhonе алып беру керек деген сылтаумен мердігер компания өкілдерінен бір миллион теңге пара сұраған.
2020 жылдың жазында Шымкент қаласының құрылыс басқармасы мен «A.S.InvestStroi» компаниясының арасында зоологиялық паркті қайта жаңарту бойынша келісім шарт түзілді. Жөндеу жұмыстары үшін компанияға 850 млн теңге төлену керек болатын.
Қаражаттың қай уақытта аударылатынын, нысанды пайдалануға қабылдау туралы құжаттарға қашан қол қойылатынын білу үшін «A.S.InvestStroi» ЖШС-нің өкілі Бейсебаев әлеуметтік құрылыс бөлімінің басшысы Бақыт Қалымбетовке хабарласты. Соңғысы тиісті құжаттарға қол қойдырып, комиссияның қабылдауына ықпал ету үшін бір айфонның құнын сұрапты.
«Қалымбетов Бейсебаевқа құрылыс басқармасының басшысы Ербол Ахметовтың тапсырмасы бойынша Шымкент қаласы әкімінің орынбасарына «iPhone 12 pro» ұялы телефонын сатып алып беру керектігін алдап айтып, бір миллион теңге сұраған. Өзінің сөзі сенімді болу үшін, нысан бойынша тиісті құжаттарға басқарма басшысының қолын қойдыруға және нысанды қабылдауға ықпал жасап беретіндігін айтқан», – деп жазылған Еңбекші аудандық сотының үкімінде.
Бейсебаев бұл ұсынысты өзінің бастығы, компанияның директоры Құдайбергенге жеткізген кезде кәсіпкер ұялы телефонның ақшасын беруге келіскен.
Қалымбетовтың қолына миллион теңге тие салысымен, оны Сыбайлас жемқорлыққа қарсы іс-қимыл агенттігінің қызметкерлерімен құрықтады.
Сот талқылауы кезінде Қалымбетовтың бастығы Ахметов қызмкеткеріне «A.S.InvestStroi» ЖШС-нің өкілдерінен құжаттарға қол қойып бергені үшін Шымкент қаласы әкімінің орынбасарына деп «iPhone 12 pro» ұялы телефонын сатып алып беру қажеттігін немесе миллион теңге ақшаны алып келу жөнінде нұсқаулық бермегенін айтты.
Алаяқтық жасағаны үшін және кәсіпкерді пара беруге азғырғаны үшін сот Қалыбековті 35 миллион теңге айыппұл төлеуге міндеттеді.
Аделаида Ауеспекова
