Орта Азия медиа форумына кімдер қатысып жатыр?

Кешелі бері Астанада Орталық Азия медиа форумы жұмысын бастады. Жиынға әр түрлі елдің өкілдері қатысып жатыр. Экс-президенттер, халықаралық ұйымдар басшылары, мемлекет және қоғам қайраткерлері, медиа саласы бойынша танымал тұлғалар келген жиынды Ақпарат және қоғамдық даму министрлігі ұйымдастырған.

Алғашқы отырысқа ҚР-ның Мемлекеттік кеңесшісі Ерлан Қарин, Түркияның 11-ші президенті Абдулла Гүл, Моңғолияның 3-ші президенті Намбарын Энхбайар, Қырғыз Республикасының мемлекеттік хатшысы Сүйүнбек Қасмамбетов бастаған саясаткерлер қатысып, форумның ерекшелігі жайлы сөз сөйлеп, пікір білдірді.

Мемлекеттік кеңесші Ерлан Қарин президент Қасым-Жомарт Тоқаевтың форумға қатысушыларға арнаған құттықтауын оқыды. Президент құттықтауында ақпараттық кеңістікті жаһандануға сай, халықаралық деңгейде ұстап отыру туралы және Орта Азия елдерінің бауырластығы, жаңа бастамалары туралы айтыпты.

Абдулла Гүл мен Намбарын Энхбайардың бұл форумға шақыртылуының да өзіндік мәні бар екен. Бұл туралы Ақпарат және қоғамдық даму министрі Дархан Қыдырәлі айтты.

«Құрметті меймандар – Түркияның 11-ші президенті Абдулла Гүл мен Моңғолияның 3-ші президенті Намбарын Энхбаярдың Медиа форумға арнайы шақырылуының өзіндік мәні бар. Мәселен, Моңғолияның бұрынғы басшысы Намбарын Энхбаяр журналистикадан жетіліп шыққан қайраткер тұлға болса, Түркияның экс-президенті Абдулла Гүл мырза фото­журналистикамен әуестенетін, жаңа медиаға жаны жақын тұлға».

Одан бөлек форумға қатысушылардың ішінде америкалық «New York Times» жасайтын бестселлер тізімінде 4 мәрте көш бастаған, қазақ қызы, бүркітші Айшолпан жайлы жазылған «Eagle Huntress» кітабының авторы Лиз Уелш пен YouTube-та 18 миллиард қаралым жиған дүние жүзіндегі балаларға арналған ең танымал dBillions жобасының авторы Ернис Уметалиев және Пулитцар сыйлығының лауреаты, фотограф Лю Хен Шинг бастаған журналистика бойынша әлем бойынша танымал адамдар; «Мир», TV9, Қазақстан Президенті Телерадиокешені, «Қазақстан» бастаған отандық арналар мен басылымдар, түрлі сайт пен ақпарат агенттіктері өкілдері қатысты.

Одан бөлек БҰҰ Бас Ассамблеясында бейбітшілік күнін бекіткен Бейбітшілік күні жаһандық жобасының негізін қалаушы Джереми Гилли мен әлемге танымал әнші Димаш Құдайбергенов арнайы сөз сөйлеп, бейбітшілік туралы толғаныстарын айтты.

Форум 2 күнге созылады және 100-ден астам спикер сөз сөйлейді. Ұйымдастырушылар бұл форумды дәстүрлі жиынға айналдыру және түркі әлемінің ақпарат кеңістігінде ортақ жобалар жасап, телехикая, анимациялық фильмдер түсіру, ортақ ақпараттық сайт ашуды көздейді.