ҚР Азаматтық авиация комитеті Біріккен Ұлттар Ұйымының «Bek Air» әуе компаниясы ұшақтарының Африкаға заңсыз ұшуын анықтауда қолдау білдіргені жөнінде мәлімдеді.
«2020 жылы Қазақстанның авиация әкімшілігі БҰҰ-ның қолдауымен заңсыз қару-жарақ тасымалдау және «Bek Air» ұшақтарының Африкаға заңсыз ұшуына қатысты нақты деректерге негізделген жауап алды», - делінген комиетет таратқан мәлімдемеде.
Бірақ мәлімдемеде «Bek Air» ұшақтарының Африкаға қай уақытта ұшқаны, қандай жүк тасымалдағаны және қандай заңсыздық жасағаны жөнінде айтылмаған.
2020 жылдың мамыр айында Қазақстанның Ливияға заңсыз қару-жарақ тасымалдауға қатысы бар екендігі белгілі болған. Сол уақытта «Bloomberg» басылымы Ливияға қару-жарақ тасымалдағандар арасында қазақстандық екі әуе операторы бар екендігі жөнінде жазған. Кейіннен Қазақстан авиация әкімшілігі аталмыш мәселеге қатысты тексеру жұмыстары басталғанын мәлімдеген.
2019 жылдың 27 желтоқсанында Алматыдан Нұр-Сұлтанға бағыт алған «Bek Air» әуе компаниясының Fokker-100 ұшағы апатқа ұшырап, 13 адам көз жұмған.
