ҚР Үкіметі техникалық және кәсіптік білім беру ұйымдарын қаржыландырудың жаңа нормативін қабылдады, деп хабарлайды Malim.kz.
Қолданыстағы жан басына шаққандағы нормативтік қаржыландыру әдістемесіне сәйкес, бір студентті оқытуға бөлінетін орташа қаражат 437 мың теңгені құрайды. Енді ол орта есеппен 912 мың теңге көлемінде болады.
Жаңа қаржыландыру нормативі негізгі және ынталандырушы төлем бөліктерінен тұрады. Ынталандырушы төлемдер нақты көрсеткіштерге қол жеткізген колледждерге беріледі.
"Бұл жаңа қаржыландыру жүйесі бәсекеге қабілетті мамандарды даярлауға, білім беру ұйымдарын заманауи материалдық-техникалық жабдықтармен қамтамасыз етуге, педагогтердің біліктілігін арттыру курстарын ұйымдастыруға мүмкіндік береді. Сонымен қатар, колледждердің оқу-өндірістік шеберханаларында өндірілген өнімді сатылымға шығару механизмі қарастырылып жатыр. Өндірістен түскен табыс білім беру ұйымдарын дамытуға бағытталатын болады", - делінген ҚР Оқу-ағарту министрлігі таратқан хабарламада.
Фото: Үкімет
